Хоржамашта кийча хилар

ГIалгIайчен Мехкадаь Администраце, мехкарча хоамбоаржабархошца вIашагIкхетар дIадихьар Евкуранаькъан Баматгире Юнус-Бека. Вай паччахь хоржача дийнахьа мехка бахархошка каст-каста хоржамех бола хоам а бе, цу хьаькъе лаьца хила тарлуш долча тийшача балха гIулакхех лоралуш боагIа хоам беш а хила, аьнна, дийхар Мехкадас гулбеннарашка.

«ЛерттIа хоам боаржабеш болча нахах санна шох тешаш ва со, оаша март бетта I8 дийнахьа мехка бахархошка каст-каста хоржамех бола хоам берг хиларах. Цул совгIа, шо кийча хила деза, моллагIа интернета оагIошка гIолла а е кхы тайпара а хоржамашка дакъа лоацача наха хьовзам хургбола хIама де уйла йолаш саг хуле, цунга гIулакх толха цадайта. ДоагIача боараме вай мехкара хоржамаш дIачакхдаха деза вай массане а цхьана», — аьнна, белгалдир Баматгире Юнус-Бека.
Хоржамаш мишта дIадолх, кхаж тоссаш болча наха дакъа мишта лоац мехкахошта белгалдарал совгIа, хоамбоаржабархожий шоаш а кхаж тоссаш хила беза из доацаш, шоай гаргарча наха кхаж тассар мел лерхIаме хIама да дIахайташ хила а беза, аьлар Мехкадас: «Вай кхоане даькъала, сийрда хилара дакъа лаца цунна паччахьалкхен хIара бIорахочун декхар долга, из Конституцен бокъо йолгах дIакхетабе беза нах», — аьнна белгалдир Евкуранаькъан Юнус-Бека.
Интернете багIаш бола нах оамалах хилабезар хьоадаьча, цох хоттаденна гулбеннарашца къамаьл дир дIахо Мехкадас.
«Вай кхувш йоагIа тIехье оамалах хилар, харцахьдар-бакъахьдар къоастаде ховш кагирхой хилар, мегаргдар-доацар фуд ховш уж хилар вайна чIоагIа лерхIаме да. Вайх хIаравар уж эздича оамалах хьалкхувргболаш къахьегаш хила веза. Къаьстта интернета оагIошка багIача кагирхоша фу леладу а, цар дукхагIа нийсагIдола хIама яздергдолаш а тIахьажа беза боккхагIбараш. ХIана аьлча вай да царна хьалхашка жопе овттаргдараш», — аьнна, белгалдир Мехкадас Баматгире Юнус-Бека.
ДIахо, интернета оагIошка багIара оамал, гIулакх мишта хила деза белгалдеш вай ишколашка деша дагIача доккхагIдолча берашта хьалхадоккхаш болх дIабахьар шийгахьа пайда бахьаш хIама хургдар, аьнна хьоахадир «ГIалгIайче» газета хоамбоаржабархочо Хучбаранаькъан Адама. «Цхьа моллагIа кхераме хIама нийсделча фу де деза, малагIа оагIо лаца еза Iомаду вай ишколашка. Цу тайпара, интернета оагIошкара оамал мишта хила еза, нахацара къамаьл мишта хила деза вай берашта хьалхадоаккхаш болх дIабахьа аьттув баьлча дика хургдар ишколашка. Хьокхама аьлча, наха сердар, наьха ийрча оагIонаш хьахьокхар, цар гIалаташ дувцар динга диллача харцахьа а, къадолаш а долга белгалдеш, цу мо долча ийрчача гIулакхашта тIагIолла саг бехктокхаме оза тарлуш хиларах хоам беш вай берашта хьехамаш доре вайна боккха пайда баргбар цох»,- аьнна, белгалдир Хучбаранаькъан Адама.
Из хьаькъал даларах хоамбоаржабархочоа баркал оалаш дIахо Мехкадас аьлар: «Информатика а, дина бовхамаш а хьехаш предметаш ишколашка йолаш я вай. Цу урокашка гIолла чакхдаккха, хьакхоачашде йиш йолаш да из гIулакх. Цу хьакъе дича бакъахьдар фуд дешара министраца доашхаргда оаха, хIаьта Миннаца тIадул аз, цу хаттара хьакъе кхы совгIа эшаргйола кечалаш дагайохар», — аьлар Баматгире Юнус-Бека.

Матенаькъан Илез

Добавить комментарий

Ваш e-mail не будет опубликован. Обязательные поля помечены *