Кемерове байнача наьха гаргарабараш хьаллоацаш таьзета ногIал дIадихьар ГIалгIайче

Кемерове «Зимняя вишня» яха махбара салоIама цIа даьга байнача наьха гаргарбарий хьал кхетадеш таьзета ногIал дIадихьар укх деношка Назранерча дагалоацама а сийлен а мемориала майдан тIа. «Кемерово, ГIалгIайче хьоца я», яьнна дIадихьача гIайгIанеча ногIале дакъалоацаш бар ГIалгIайчен правительства тхьамада Гаьгенаькъан Руслан, Халкъа гуллама депутаташ Амренаькъан Марем, Хамхой Батыр, правительства тхьамадан гIончан декхараш кхоачашдеш йола Овшанаькъан ПятIамат, Мехкдаь администрацен кулгалхо Яндакъонгий Мухьмад, министерствай кулгалхой, юкъара болх лелабераш, хоамбоаржабархой иштта Кемерова бахархоех дог лазараш а, цар бала гIайгIа кхетадераш а.
БIаьж совгIа болча ГIалгIайчен бахархоша саг йист ца хулаш цхьа минот ха яьккхар таьзета ногIале баьхкача. Доккха хатар хинна боахкачарца цар бала гIайгIа декъаш бар цу гIулакхах дог лазаш мемориале баьхкараш:
«Дешаца дIаоалалургдац, мел хала да укх деношка цу унзарча хатарах дола хоамаш деша а цох дола керда гучадоалар хьахаза а. Цхьаккха саг висавац из хала цахеташ. Еррига паччахьалкхе цох цатоам хинна я. Шоай вахаре эггарга хьамсардолчох къаьстача нахаца цар бала бекъаш гIайгIа еш да ГIалгIайчен халкъ а. Меттаотталургдоаца довр да из», — аьнна белгалдир правительства тхьамадас Гаьгенаькъан Руслана.
Кердадаккха лов, март бетта 25 дийнахьа цIи а яьнна, Кемерове «Зимняя вишня» яха махбара салоIама цIа даьга хинна хилар. Иштта цига хиннача зуламах Кемеровски областа МЧСа викалаша беча хоамах 60 совг1а саг веннав, царех 40 совгIа бераш да.
Из хатар хиларца Россе паччахьа Путин Владимира март бетта 28 ди къамайюкъара таьзета ди да аьнна, хьакхайкадаьд, цунга товш долча указа кулг яздирца.
Цу унзарча хатарах дог лазаш из хала хеташ Къилбаседа Кавказа халкъаш а таьзета ногIалаш дIакхухьаш да. Цига байнача нахага кодам беш, уж хьаллоацаш дешаш аьннад ГIалгIайчен Мехкдас Евкуранаькъан Баматгире Юнус-Бека а. Ший къамаьле цо белгалдир, хиннар кхы цIаькха хилийта йиш йоацаш паччахьалкхен доккха халахетар да, аьнна.
Март бетта 27-29 деношка ГIалгIайче гIолла таьзета денош да аьнна хьакхайкадаьд Мекдас. Цу кхаь денна Г1алг1ай мехка гIолла цхьаккха тайпара салоIама а сакъердама а вIашагIкхетараш ловзараш хургдац, иштта мехка телевиденешка а цу деношка салоIама программаш хургйоацаш юхаяхай.

Матенаькъан Илез

№ 45-46 (11981-982), ера, 29 март, 2018 шу, четверг, 29 марта 2018 года

Добавить комментарий

Ваш e-mail не будет опубликован. Обязательные поля помечены *