Дошо оаз

ГIалгIай мехка йовзаш йолча Ахциева Розай масса шу даьннад дIаяздеча хана, айса цунна ши пхиъ оттаеш санна хетаделар сона. Бокъонца бакъдар аьлча, цо хьабена вахара никъ ба-м ба пхиаш оттае мегаргйолаш, хIана аьлча даим нийсача хIаманца хила гIерташ, къахьегаш, наха товр де гIерташ, яьккхай цо ше хIанзалца яьккха ха.
Роза яьй 1963 шера 10 апреле къаьнарча МагIалбике. Цар дезале 12 бер хиннад. Дерригаш хIана дац аьнна иллеш аларца, хоза халхар дарца белгалдаьнна а хиннад. Роза царна юкъе 8-гIа хиннай. Шоай гIалий тIарча №18 йолча юкъерча школе дешаш йолаш, гучайоал цун иллиалархочун говзал. ПхелагIча классе мара яцар йиIиг, эггара хьалха сцена тIа арайоалаш. Цул тIехьагIа, районерча пионерий цIен директора Тамара Степановнас каст-каста хьехар зIамига артистка бе-беча вIашагIкхетарашка, цIайшка илли ала. Иштта дIайолаенна, шерагара шу мел доал дегIайоагIаш, къаманна дукха езаеле, дIайода Жабраила Роза.
1982 – 1984 шерашка из дешаш хул Шолжа-ГIалий тIарча кооперативни техникуме. «Юртбоахама кхачан товаровед» яха болх Iомабу цо цига. Из балха говзал цунна дикка накъайоал, къаьстта ший дезал хьахинначул тIехьагIа. 1987 шера ГIажарий-Юртарча Горданов Хьасанага маьре йода Роза. Тюменски областа баха дIабахе, тайп-тайпарча районашка болх беш, пхи шу доаккх цар. Цигара цIабаьхка цхьа ха яьккхачул тIехьагIа, кхы а пхе шера юхаболх. Розай цIен-да совхоза директора гIишлошеярах вола заместитель хул, Ахциевас ше бухгалтера болх бу. Бакъда Роза моттигерча наха къаьстта дукха езаелийтар дар, цо иллеш хоза оалаш хилар. Дезача деношта хетаяьча моттигашка, массаза цо илли аларга сатувсаш хиннаб цу кIалха баха нах. Цу хана яь я цар цаI мара йоаца йоI Фатима.
2005 шера шоай мехка цIабоагIа уж. Кхы а цхьа шу даьлча (2006), Роза балха дIаэц Хамхоев Ахьмада цIи лелаеча республикан филармоне солистка йолаш. Дезала ираз сов дIаьха хиланзар цар, 2008 шера цIаьхха валар нийсделар фусама-даь. ХIанз йоI кхеер а IотIадижар наьна белаж тIа. Школа а университета аграрно-инженерни факультет а йоаккхийт цунга нанас. Соахка ткъаь итт шу дизад Фатимай, ший дезал а болаш, Аьлтий-Юртарча Мержошка маьре а йолаш, диъ бер кхедеш йоалл из. Цун ши воIи ши йоIи да, царех цхьа кIаьнк, наьна-даь цIи а лелаеш, Хьасан яхаш ва.
ХIаьта Ахциева Роза вай республике хулача бе-беча концерташка дакъалоацаш го йиш я. Иштта дакъалоацаш хиннай из республикал арахьа хулача фестивалашка а яхьашка а. «Шатлакъ, Котало» яхаш яр Ростове хинна, Сийлахь-боккхача Даьймехка тIем тIа баьккхача толама хетаяь фестиваль. Цига бахача вай артисташца яр Роза а. 2009 шера «Дошо микрофон» яха СКФО яхь хилар, цигара дена совгIат а – лакхе хьоахаяь микрофон – тахан иллиалархочун цIагIа латт. Из енна кхо саг мара вац вай къаман артисташта юкъе: Барахоева Люба, Эсмурзиев Iалаудин, Ахциева Роза. 2014 шера Соче хилар халкъа кхоллама фестиваль, цига вай мехкахочо даьккха «Салам хьога, ГIалгIайче» яха илли хоза хеташ тIаийцар ладувгIа баьхкача наха.
Таханарча дийнахьа Розас доаха иллеш тайп-тайпара чулоацам болаш а, бе-бе автораш болаш а да. Царна юкъе да Евлоев Илеза «Ма дувца», Султыгова Лемкай «ЛадувгIа, кIант», Кодзоев Асланеи Мальсагова Заремайи «Наьначе-ГIалгIайче» яхараш а кхыдараш а.
Карарча хана Ахциева Роза ший маьрцIаьшта юкъе ГIажарий-Юрта ях. Цо хьегаш дола къа зийнад къамо а, культуран болхлоша а, паччахьалкхено а; цудухьа цо деча дикача хIаман мах беш, цунна еннай «ГIалгIай республикан гIоръяьнна артистка» яха цIи. Ала деза вайна массанена йовзаш йола Ахциева Хадижат цун нанас яь йоккхагIйола йиша я, аьнна. Вешта аьлча, ашарий хам ховча цIагIа кхийна я Роза. Из кхы а дуккхача шерашка, ший иллешца наьха дегаш хьесташ, яхилга ловргдар сона.

С. Арчаков

№ 55 (11991), ера, 12 апрель, 2018 шу, четверг, 12 апреля 2018 года

Добавить комментарий

Ваш e-mail не будет опубликован. Обязательные поля помечены *