Iалама йоакхо яр

ГIалгIайчен экологехи Iалама торонехи йолча комитете лоткъам хиннабар Экажкъонгий-Юрта вахархочун, цу юрта экологен бокъо толхаяь моттигаш я аьнна. Цу хьаькъе бола лоткъам нийса бий а, из мишта нийсденна гIулакх да а хьажа баха хилар, Комитета болхлой. Цох бола хоам язбу Комитета сайта тIа.

Язбаьча лоткъам тIа хьоахадаьча тайпара, экологи бокъонах доацаш гIулакх гучадаьннад комитета болхлошта. Из да Береговая оалача новкъа лохе Кен чу кагъенна хьа а хаьда га чуйожарца нувхаш Iайна хий бIехденна хилар. Юрта администрацен тIадиллад кIирах латтача хана чухьа аьлий нувхех хьацIена а дий, хий лорадарах долча закона бокъонаш кхоачашъе аьнна. Цул совгIа, юрта бахархошца къамаьл даьд комитета болхлоша, цу тайпара хIама кхы нийслургдоацаш шоаш дахача юхе гIолла бIаргкхоабаш а де декхар дар хьадеш а, хила аьнна.
Белгалъяьккхача хана чухьа Экажкъонгий-Юрта администрацен кулгалхоша цу гIулакхах фу даьд а, шоай де доагIар цар кхоачашдаьдий а хьажа юхагIоргболаш ба Комитета болхлой. Нагахь санна де доагIар хьа а даь, из гIулакх юстарадаккханза хуле, экологии Iалама торои толхадарах бехктокхаме озаргйолаш я юрта администраци.
ГIалгIайчен экологехи, Iалама торонехи йолча комитето мехка бахархой тIахьех моллагIа вай мехкара Iалам бIехдешдола хIама гучадаьлча, из къайла а ца хьош, цох шоашка хоам бара. Нагахь санна цу тайпара моттиг нислой хоам бе йиш я 8 (8734)55-15-89 яхача телефона номерахи, press_komitet@bk.ru яхача электронни адресахи.

Укх деношка дIайихьача, хIара шера Мехкдас Халкъа гуллама депутаташка еча послане ГIалгIайчен Мехкдас Евкуранаькъан Юнус-Бека, экологи гIулакх дизза кхоачашдара тIахьийхар мехка Iаьдала массабола юкъарчен хьалххой.
«Россе Федерацен керттерча хьожадарах цаI хинна латт, 2025 шерага кхаччалца ха белгал а яь экологехи гонахьарча Iаламахи дола хаттараш дашхара тIехьа хьинаре къахьегадезаш», — аьнна хьалхадаьккхар Мехкдас.
Ший послане Баматгире Юнус-Бека массайолча юрта даьшта хьалхадаьккхар, хьинаре къахьегарца, бокъо йоацача Iойилла кхалаж дIайоаккхаш а, нувхаш Iокхувсаш бола нах бехктокхаме озарца а экологи лораерах бола болх тIехдика чакхбаккха аьнна. Цул совгIа, хьоадир цу гIулакха тIахьожам бергбола комиссе вIашагIа а елла,боагIача боараме къахьегаш болх бе беза аьнна.
Мехкдас яхачох, дIадахача 2017 шера экологи даькъе мехка хьал тоадеш боккха болх дIабихьаб ГIалгIайче гIолла. «Россе хий» яхача ерригача Россе гIолла дIадихьача доккхача ногIалга дакъалоацаш шин шера тIа-тIа йоаккхаш хьалхара моттиг яккхарца цу даькъе котъяьнний ГIалгIайче. Иштта хьалхарчарна юкъе ба вай мохк, «Баьццара Россия», «Баьццара бIасти» яхача ногIалашкахьа а. Цул совгIа, экологен эггара кIезигагIа зе деш йола моттиг я аьнна белгал баь а ба ГIалгIай мохк.
«ГIалгIайче, 2018 шера паччахьалкхен хьалхарча мугIарашка латтача мехкашца дIаоттаргья кердача ражах нувхаш гулъяра а уж дIа-хьа нийсъяра а тIехьа болча боламца», — аьлар дIахо, ший къамаьле Евкуранаькъан Юнус-Бека.
Экологи даькъе дола ший дош чакхдоаккхаш Мехкдас белгалдир, Iалам лорадара тIехьа паччахьалкхен тIахьожам чIоагIагIа хугба аьнна. Цудухьа хьинаре къахьегарца лерттIа хьагучаяха еза бокъо йохаяь, Iалам бIехдеш йола нувхаш Iокхийса моттигаш. 2017 шера цу тайпара 497 моттиг гучаяьннаяр, царех дукхагIъяраш, болх хьабарца юстара а яьхай.

Экажкъонгий-Юрт яле а, е кхыйола юрташ яле а, Мехкдас ший послане хьалхадаьккхача экологи лораярах долча хаттарашкахьа, бизза шоай болх дIачакхбаккха декхарийла я хIара юртара администраци. Нагахь санна цар из болх кхоачаш ца бой, уж Iаьдало экологии даькъе оттадаьча законах бехктокхаме озаргба. Из хьадой нийса а хургда. Цудухьа хьамсара мехкахой, вай массадараш а фийла хила деза воашта гонахьара Iалам унахцIена а, сапаргIата а хилийтара.

Матенаькъан Илез

№ 55 (11991), ера, 12 апрель, 2018 шу, четверг, 12 апреля 2018 год

Добавить комментарий

Ваш e-mail не будет опубликован. Обязательные поля помечены *