Сийрда никъ

1923-ча шера май бетта хьалхарча дийнахьа араяьннай гIалгIай къаман газета хьалхара номер. Дукха ха дIаяхай цу хана денз, дукха хIама хувцаденнад. Паччахьалкхен оттам а хувцабеннаб, паччахьалкхе ше а хувцаеннай, газета йоазув а хувцаденнад: из арадувла долалуча хана гIалгIай йоазув латиница кIийлен тIа дар, хIаьта тахан – кириллица кIийлен тIа да. Цхьабакъда, цхьа хIама да вIалла хувца ца луш – «Сердало» газета лостам а цу газета хьалхашка латта декхараш а: гIалгIай кхетам тайпан яхьа тIара къаман яхьа тIа баккхар, цивилизацен кIийлен тIа халкъ кхотадар, къаман сакхетам сомабаккхар. Иштта цу декхарашта юкъе да вай къаман культураца дикагIа мел дар, таханарча вахарца товш мел дар хьаллацар, наха юкъе дIадоаржадар. ХIаьта уж декхараш биззача боараме кхоачашде вай вIаштIехьдаргдац гIалгIай мотт гIалгIашта юкъе шерра дIабоаржабар вай Iалаш ца дой. Цудухьа гIалгIай мотт лорабар, из дегIакхувлар, из наха юкъе боаржабар а да газета керттерчарех цхьа декхар.
Укх бIаь шу гаргга йолча хана ший керттерча лостама тIара ца доалаш, уж деррига декхараш кхоачашдеш хьадоагIа «Сердало» газет. Массехказза ха енай из арадувлар соцадеш, ший декхараш дизза кхоачашде цун вIаштIехьа ца доалаш. Цхьабакъда, ший бехках, цу газете болх беча журналистий бехках хиннадац из цIаккха а. Уж хала ханаш дIайоаллашехьа а газет юхаметтаийттад.
«Сердало» газета болхлой массаза а хиннаб гIалгIай халкъа бала шоай дегашка лелабеш. Цу дешашта тешал деш белгалдаккха ловра цхьаькха цхьа хIама. ГIалгIай къаман йоазонхой дукхагIбараш «Сердало» газете болх баь ба. Цигача ирбора цар шоай къоалам, цигача шаьрбора цар шоай мотт, цигара болабора цар шоай кхоллама никъ. Цудухьа царна дика ховш а хулар гIалгIай къаман вахар, гIалгIай къаман бала, гIалгIай къаман догдоахилге. Цудухьа халкъо безамца тIа а эцар цар кхоллам.
Ше хьакхеллача дийнахьа денз «Сердало» газето Iо ца юлаш лелаяь къаман яхь лелаеш, газета хьалхарча болхлоша – Малсаганаькъан Зоврбика, Беканаькъан Тембота, иштта кхычар, газета хьалхашка овттадаь декхараш кхоачашдеш хьабоагIа газета болхлой тахан а.
«Сердало» газета юбилейца уж дег тIара даькъала а бувцаш, царна ловца баккха ловра. Дала Ше даькъалдолда шо, Дала Ше аьттув боаккхалба шун дикача хIаманна тIехьа. Шоана шоашта а, вай паччахьалкхенна а, вай къаманна а беркате хилба шун болх.

Ноакастхой Хаваж, ГIалгIай мотт дегIакхувлара фонда Директор

№ 65-67 (12001-003), пIаьраска, 4 май, 2018 шу, пятница, 4 мая 2018 года

Добавить комментарий

Ваш e-mail не будет опубликован. Обязательные поля помечены *