Къахьегама балхаш Iалашдараи социальни хьашташ дегIадоаладараи дола вIашагIкхетар

Укх деношка ГIалгIайчен Парламента ховшараш хулача доккхача цIагIа Халкъа гуллама тхьамадас Йовлой Заьлмаха 6 тIабехарга 24 хар дIадихьар. ГIалгIайчен Правительства доакъашхоша, тIахьожам беча органий хьалхалаттараша, иштта министерствай, ведомствай, муниципальни образованей болхлоша дакъа лаьцар цу балха юкъе. Цох бола хоам язбу ГIалгIайчен Парамента лаьрххIа йолча сайта тIа.

АргIанара ховшар хьаделлаш йистхилар парламента тхьамада Йовлой Заьлмах. Ший къамаьле цо даькъала бийцар гIалгIай метта, Iаьдалкхоллама болх бе гулбеннараш, иштта аргIанарча ховшара викалаш.
Ук ховшарга Халкъа гуллама депутаташа ладийгIар 2017 шера даьчох ГIалгIайчен Къахьегамаи, социальни хьашташ дегIадоаладираи йолча Министерства кулгалхочо Котиканаькъан Заьлмаха ший отчетагахьа дийцача къамаьлага. Iаьдала бокъонах оттадаь выплаташ, пособеш, компенсацеш дIателар кхоачашдеш ГIалгIайчен къахьегама министерствос баьча балхах бола хоам бир цо ший доклад ешаш.
Иштта Котиканаькъан Заьлмаха довзийтар, Россе Паччахьа майски указаш мехка долчун даькъ тIа кхоачашдирах дола гIулакх. Путин Владимара бюджетникий алапе хьакъехьа 2017 шера тIадиллар кхоачаш а деш социальни болхлой юкъера алапи 15840,0 сом, регионе долаш долча къахьегама юкъарча доходах 82,3%, хилийтад. Цу наькъаца аьттув баьннаб мехка балхазал лохъе а, болх боацаш багIача наха Iалашо йирца балха моттигаш кийчъе а.
Балха таьрга хьакъе дар дувцаш министра теркалдир, балха боаца бIорахой дIаязбара хIама лаьгIдаларца дувзаденна тIеххьарча 2 шера динамика дегIаахара гIулакх. Иштта цо белгалдир, 2014-2020 шерашка ГIалгIайчен бахархоша дечох боахкаш хилийтара гIонна йолча подпрогграмма наькъашца 2018 шера январь бетта хьалхарча денга кхаччалца дIалаьрхIача мехка балха боацача нахах 3794 саг балха оттаваьв, 10309 сага профориентаце еча гIо а даьд, аьнна.
«Программо яхар кхоачаш а деш нах балха меттигашца Iалашбар духьа дарех да лакхарча дешарцара дараш вIаштIехьадоахача дIакхохьаш дола балхаш. 2017 шера стажировках хьожаваьв балха бац аьнна дIаязбаь учете латтачарех 261 выпускник а стажера цун говзал лакхъяра гIо деш вола 84 наставник а», — аьнна къаьстта теркалдир Котиканаькъан Заьлмаха.
Министра яхачох, «доступная среда» яхача паччахьалкхен программах федеральни а мехка а бюджеташцара тIах аьнна боацача тоабашцарча наьха а керт-керттера йолча объекташцара оагIув аттача боаккхаш массехк цу гIулакха хетадаь вIашагIкхетараш дIадихьад. Беррига а цу хьаькъе баь болх 21 объекта адаптаци йирца ба.
Цул совгIа, цхьацца бIарга гораргахьа а лерга хазаргахьа а эшамаш долча наха лаьрхIа вIашагIъелла, хIа аьннача эшаш дола гIо дергдолаш, ден-бус болх беш бувзама диспетчерски центр я, субтитраш а тифлокомментировани а йолаш кинохьокха кинотеатр я, тIаккха иштта проффесиональни коммуникаце даькъ тIа болх бе кийчбаь эрсий оашхарий метта говзал караерзаяь таржамхой а ба.
Ший къамаьл даьлча Котиканаькъан Заьлмаха профильни комитетете а Парламента электронни почте а мехка бахача наха шоашка хьаахийтача хаттарашта жоп делар. УнахцIенено лораеча юкъарчешка дIаухаргболаш телача путевкай, из эшаш болча наха лаьрхIача транспорта, кхы дIаха балха оттабира, мехка балхазал лохъяра, социальни объекташта паспортизация яра, кхыдарий хьаькъе дар депутаташ хьакхайкадаь хаттараш.
Ховшара доакъашхошка къахьегама министерства субсидешца 200 эзар сомал материальни гIо дергда цхьацца ше-ший хIама хьаделла гIерташ болча бIорахошта аьлар Министра тIехьара тIа, шишша саг шера йолча хана предпринимателаш балха а отторгволаш. Наькъа ваха-ва таро луш долча билета хьаькъе Министр раьза хилар депутаташ аьннача деша, – хIанз кхаь бетта мара лаьрхIа доацача цар бокъо ахшерага кхаччалца хилийта.
Юххера халкъа гуллама аргIанара ховшар чакхдоаллаш парламентарий предложенеш а рекомендацеш а юкъе йола, эца безаш бола соцам тIаийцар.

№ 84-86 (12020-022), шинара, 5 июнь, 2018 шу. Вторник, 5 июня 2018 года

Добавить комментарий

Ваш e-mail не будет опубликован. Обязательные поля помечены *