Нана

БАЗЕНАЬКЪАН Милаграс

Нана, хьа во ма гулда тхона, хьа диках ма далда тхо. Хозача кIаьдача дешашца хьестийла хьо наха! Ер ловца баккхарца йолаю аз сай статья, хIара сага нана еза а боча а хиларах. Эзди къонахий, йоазонхой, Iилманхой, турпалхой кхебераш вай ноаной ба. ХIаьта, массаза а, нана а наьна–нана а. хаьтте де оалаш хиннад вай даьша йиша–воша.

Нана Дала Къуръана чухьа аяташ а доссадаь, цунга хьажа, цун лерхIам бе аьнна амар даь хьоахаяьй вайга. Ший наьнаца даьца дезалхо дика хилар Дала ше цаI варца хетта да. Ялсмале наьна когашта кIалйоал, аьнна яздаь да. Цун маIан да, наьна дозал докха хилар.
Сага, хьайбай, оалхазарий, дунен тIа Дала хьа мел кхеллача дийнача хIамай эггара хьамсарагIа яр нана я. Цун кулгий йIовхал, дог хьеста цун кIаьда оаз, из ба дуненцара чам. Бийсаш йоаеш, са ца лоIаш, ший дегI ца кходеш, вай дунен тIа даьннача дийнахьа денз вайца я нана, цун кIаьда дог вайна йIовхал луш да даим.
Боккха–зIамига, къаьна–къона из вале а, нагахьа санна ший къам дезаш из вале, цох ший цIенна а, тайпа а, юрта а, къама а, накъавоалаш эзди саг хургва. Эзди йоI, цIен–нана, нана, из я гIалгIай сув. Нана даим ший дезалга хьожаш я. Из вIалла Iохац. Iуйранна ший дезалга хIама даийте, цIена хIамаш тIайийхе, ший дезалхо накъавоакх цо. Ший бераш чудаьхкача а хьож из дезалга. Ший мел йола ха вайга хьожаш йоаю нанас. Цудухьа, вай дерригаш цунга хьажа декхарийла да. Наьна хам баь вай даргдац. ХIаьта дукха къахьега деза вай цун сатем лорабе аьнна. Вай декхар да из.
Нана еза а, хьамсара а, боча а хилар гойташ язъяь Iалаьмате дукха байташ я. ХIанз дIахо йоалаергья вай гIалгIай йоазонхочо Талданаькъан Марема язъяь «Нана» яха байт:

Нана

Са хьамсара нана, хьо еза сона!
Са хьоцара безам бийца яргьяц…
Сай са, сай вахар лургдар аз хьона –
Хьо йоацача вахарца са чам хургбац.

Дукха халонаш лейний Iа тхоца,
Тхо кхеде гIерташ хала кхийстай.
Дог Iувдаш, сагото южаяьй кер чу,
«Шо духьа» яхаш, бала бицбаь….

Вахара мах кепигал боацача
Цу наьха Iоттараш бIарг белхабеш,
Хала диад Iа ер дуне, нана.
Сийрдача вахарах дог хьегадеш.

Хала да чIоагIа укх заман ваха,
Бицбеннаб адама шоай дунен мах –.
Даьла вицвенна лелача наха.
Ма хала хургда шоай маIан лах!

Сай сил дукхагIа хьо еза, нана!
Хьо йолаш оаха Далла хоастам бу!
Эзар шерашка яхийла нана!
Хьо йолаш оаха хьона хам бу!

№112 (12048), шоатта, 28 июль, 2018 шу. Суббота, 28 июля 2018 года

Добавить комментарий

Ваш e-mail не будет опубликован. Обязательные поля помечены *