Мехкдаьттхоех дола книжка

Цу дешаша цу сахьате дагадохийт вай къаман гIорваьнна хиннача йоазонхочун Боков Ахьмада «Седкъашта юкъе седкъа санна» яха роман. Укх шера 40 шу дизад из эггара хьалха Шолжа-ГIалий тIарча книжни издетельстве кепа теха, литератураца хьакъ долча нахага дIакхаьча. 1978 шера даьлар из ара, роман яздаь дар гIалгIай меттала. Шин даькъахи эпилогахи латтача цун 268 оагIув яр. Беттгаргага хьожжаше а ховра йоазоно бувцараш къахьегама нах болга. Балха гIирс бувхаш массехк саг вар цу тIара гуш. ГIалгIай мотт нийса а цIена а хиларах тешавеш ба цу тIа къаьнарча журналиста, таржамхочо, йоазонхочо Чахкиев ТIегала Ювсапа баь болх. Из хиннав цун корректор.

Йоазонхочун кердача романа бувцараш мехкдаьттхой бар. Цар доаха толамаш, мехкдаьтта халкъа ма хулла дукхагIа дала гIертар, вахаре а балха а нийслуш йола халонаш, кхыдараш. Бе-беча къамех бола нах ба «Iаьржа дошув» доахарашта юкъе. Масала, укхаза гу вайна Султанов, Гладков, Фролов, Алиев, царна нийса бурув тохача къахьегаш бола кхыбола болхлой.
Духхьала беш бола болх бийца ца Iеш, вахара кхыйола оагIонаш а гойтай автора ший говзамеча йоазонга гIолла. Масала, Гладковеи Тоняйи, Салманеи Азайи безам; бус вахтови хьисапе балха болча нахах мел саготду цар дезалаша.
Белгалдаккха лов, из роман яздарца Боков Ахьмада ший дакъа юкъедихьад вай заманхоех дола литература дегIадоаладеча гIулакха. Цул совгIа, цо дика гойтад мишта хьахулаш, чIоагIлуш, дIаотташ йоагIа вай мехкара болхлой класс. Ховш ма хиллара, цу теманна хетадаь романаш цхьан кулга пIелгашца дагардилла а дац вай къаман. Бакъда дIахо дIайодача хана уж хиларга сатувсилга-м я, хIана аьлча из никъ хьабийллаб хургболча йоазонхошта Боков Ахьмада а кхычар а яздаьча къахьегамхоех долча книжкаша.

С. Арчаков

№123 (12059), шоатта, 18 август, 2018 шу / Суббота, 18 августа 2018 года

Добавить комментарий

Ваш e-mail не будет опубликован. Обязательные поля помечены *