ТIемах дувца очерк

Сийлахь-боккхача Даьймехка тIема тема цIаккха къалуш, хийрайоалаш яц вай мехка бахача нахá. Цун ший бахьан а да. Боккха мах ба советски халкъо цу коталонах беннар. Ткъо миллион совгIа нах бовр – уж бегаш бац. 60 шу хьалха, 1958 шера, ший бIаргашта бIаргадайна а ше лайна а хIамаш дувцаш, «Советски сага лоIам» яха очерк язъяьй Зязиков Хьусена Бахьаудина. Вайна ховш ма хиллара, из ший лоIамагIа тIем тIа ваха хиннав. Политрукий курсашка из вагIача хана, цунца дешаш хиннав тIехьагIа Советски Союза Турпал хинна, татрий къаман гIорваьнна поэт Джалиль Муса.

Зязиковс ший очерка тIа дувц шоаш моастагIчун гонна юкъе бисарах а цу юкъера ара мишта бовла лаьрхIар а. ЗIамигача тоабашта бекъабенна ца баьлча, моастагIчо атта зувргболаш хиннаб уж. Бакъда ден-бус никъ бича, цу зIамигача тоабаех юха а хьахулаш хиннад тIема доакъош, кхыбола эскархой хьабеттабалар бахьан долаш.
МоастагIашта кара ца яхийта шоай типографех а герзех а фу дора; дIахо бе безача наькъа хьакъехьа фу дувцар; бус царга тIа царг ца отташ шоаш мишта шеллора, царех тара кхыдола дешаш дийцад йоазонхочо цу очерка тIа. Бакъда эггара хьалха цо белгалъяьккхар я советски сага майрал, моастагIа эшаваь, цунгара котало яккхара тIаберзабаь лоIам. Из лоIам ба фашисташта кагбе а эшабе а цамогаш хиннар, вай мохк котбаьккхар. Денал долаш гу вайна полка кертте латташ вола Михайлов, полковника адъютант Захаров, къаьстта а садехка майра ва рота командир Соколов. Уж санна бола нах бахьан долаш, боккха толам баьккхаб вай эскаро.
Ювцаш йола очерк Iомаяьй школе дешаш долча бераша, цунга гIолла хайнад царна тIемах дола бакъдар, вай халкъа турпалий гIулакхаш а дайзад. Вешта аьлча, шоай мохк лорабеш мишта лаьттаб вай дай бакъдолча масалашца довзийт цу йоазоно. Из очерк даим яхаргья аьнна хет, вай мохк мел латтача хана.

С. Арчаков

№123 (12059), шоатта, 18 август, 2018 шу / Суббота, 18 августа 2018 года

Добавить комментарий

Ваш e-mail не будет опубликован. Обязательные поля помечены *