БЕРИЙ УЙЛАШ ЙОВЗАШ

Дукхача хана денз, «СелаIад» оалача берий журналаца айхха бувзам болаш хьайоагIа къона йоазонхо Наурузова Макка. Къона я аз цох алара бахьан цаI да – дукха ха яьннаяц цун. Укх деношка сога кхаьчар Маккас яздаь «Чайтоанг Моажи» яха стихай книжка. Эггара хьалха белгалдаккха лов, из хоза бесаш а сурташ а долаш, хьожаш волча сага безаме хетаргдолча тайпара кийчдаьлга. Сурташ даьхкараша мо редактораша а корректора а къахьийгадаларе, из кхы а дикагIа хургдар аьнна хеталу.

Нагахьа санна Макках дувце, из деша говзал йолаш, берашта дезалургдола хIама зе а харжа а ховш саг я. Из белгалдоаккхаш хулар массехк шу хьалха вайцара къаьста берий воккха поэт Гагиев Гирихан. Бакъда из говзал корадаь жовхьар санна хIама я. Цох хоза хIама хьае Iомавала веза, из шаьрдеш, хьокхаш, тоадеш. Жовхьар хьалаха хой а, цу тIа болх бе геттара дика Iомаеннаяц Наурузова. Ха дIа мел йода, цунна могаргда аьнна хет сона из болх бе а. Цкъаза цунна новкъостал деш хила беза редактораш. Нагахьа санна цхьа-ши дош, мугI е ши мугI тоабича стихотворени дикача оагIорахьа эргайоалаш яле, из гIо цунна де, эшар хьалхадаккха декхарийла ба уж. «Книжка тIа цаI хинна а дика байт яле, из книжка во дац» оалаш да. КIеззига хIама тоаде мара ца дезаш, дика стихотворенеш массехк я укх тIа. «Вай» яха стихотворени иштта хилча бакъахьа хетар сона:

«Зале, Дале
Алац «сай»,
Шинне оалаш
Хьахоз «вай».

Маьчеш я вай,
ТIормиг – вай,
Хувцаш ювх цар
Кочилг кIай!

ГIадъух нана,
ГIозбувл дай!
Ду аз царга
Хаттар сай:

«Шун долий уж
Шедоа бер?
Ма хоза да
Берий лер!»

Юхакхайкар
Сога дай:
«Да уж бераш,
ЙоIилг, вай».

Цхьаккха хIама эргадаккха ца дезаш, говзача поэта санна язъяьй «Копилка» яха байт. Укхаза шедар да: берий мотт, хоза уйла, бакъахьара хьехам, нийсъяь рифма. Вешта аьлча, хила ма йоаггIара стихотворени я из:

«-Фуй хьа бе, Камилка?
— Укхох оал копилка —
Ахча Iоадерг! Банкомат!
Дега боча бола кад!

Ер ба цице дахчан корта,
Ахча да са укх чу шортта.

Iоадеш, Iоадеш, Iоадеш,
Кходеш, кходеш, кходеш…

Ахчах фу де йоалл со ховре!..
Дади вига санаторе!»

КIеззига шаьрйича, хоза ек «ДогIа» яха стихотворени а. Маккийга ала лов, поэтессай бIарг ба хьа, уйла я, дог да. Уж хиннадецаре-м хьайна отпусках хьа мел денна ахча, книжка арахецаш, Iодулларгдацар Iа. Бакъда хьайна кораяь хоза уйла хозача гома чу Iочуйолла ховш хила еза хьо. Iа из Iомадойя, со тешаш ва, хьох йоккха, говза поэтесса хургья. Цу гIулакха шераш деза. Сих ца луш къахьега Iама еза. Аьттув балба хьа цу новкъа! Цхьаькха цхьа хIама да белгалдаккханза даргдоацаш. Корректор фийла хиннавац.
Чайтоанг язде дезача чайтонг яздаьд. Геттара новкъа да, из книжка цIерца дувзаденна хилар. Мухьмад язде дезача Мохьмад яздаьд. Из цIи «о» долаш нохчаша мара язйиц, цу тайпара моттигаш кхы а я книжка тIа. ЦIаькха арадоаккхача хана, дикагIа деша деза из.

С. Арчаков,
Россе йоазонхой Союза доакъашхо

№128 (12064), шинара, 28 август, 2018 шу / Вторник, 28 августа 2018 года

Добавить комментарий

Ваш e-mail не будет опубликован. Обязательные поля помечены *