ОРИГАМИ ЙОВЗИЙ ШОАНА?

Вахар кердача хьисапе дерзарга хьежжа, гучадувлаш латт тайп-тайпара, хьалха вIалла довзанза хинна, говзала наькъаш. Оригами, квиллинг яха кулгаговзала дакъа атта карагIдоалаш гIулакх дац. Хьалха дукханешта довзаш хинна деце а, тахан къона говзанчий чIоагIа къахьегаш ба из говзал тахкара. Интернета доазув хьалдикъа да каьхатах хьаеча хIамаех: гIургIажаш, котама кIоригаш, къоаламаш чулеладу кIопилгаш, тускараш-цхьалхача каьхатах хьа ца еш фуй оригами йовзача наха?

Из говзал шаьра йовзачарех я Новрузанаькъан Мухьмада Марет. Ше цу даькъе къахьега мишта йолаелар дувц Марета: «Цкъа цхьаннахьа хьоашалгIа яха йолаш оригами техникаца вIашагъелла гIургIаж яйра сона, кора тIа латташ. Чу а ена, со тахка хайча, сона гучадаьлар, из говзала никъ фу цIи йоаккхаш ба. Оригами аьнна латтар, интернете хьажача яздаь, хьокхама оттаяь латташ хIамаш а яр волавала безам болчоа лаьрхIа. ГIургIаж, техникага хьежача аттагIа яр: из вIашагIъеллар аз эггара хьалха, шаьрлуш, шаьрлуш, йолаелар со чоалхане балхаш де», — ший хIара болх къаьста белгала а боаккхаш дийцар Марета.
Тахан цо каьхатах вIашагIъехкача хIамашта юкъе эггара боккхагIбола болх – маьждиг да.
— Дукха ха дIаяхай са, — йоах Марета из хьалдотташ! — Кхаь бетта яьлар со, балхагахьа эшашдола каьхат тедаш, нийсдеш, вIашкадехкаш, тIаккха хIара «кирпишк» Iоюллаш а къахьийгар аз!»
Цул совгIа цо яьй гIалаш а, цIенош а, дошо хIамаш чулелаю хоза яьшкаш а, кхоаламаш чулеладергаш а.
Мичахьара хьайоагIа из кулгаговзал? Дукха хана денз йовзаш я оригами Японе, цигара ба цун хьалхара никъ. Оригами «вIашкадилла каьхат» яхалга да цар меттала, уж ба из говзал эггара хьалха гучаяьккхар а. Квиллинг а ба каьхатаца бувзабенна болх: оригами-каьхат вIашкадиллар дале, ер тедар да.
«Эггара хьалха сурт досс керта чу! Цхьайола хIама оригами техникаца мара вIаштIехьаялац, квиллинго шортта ха дIалоац, дукхагIа кIодаца болх бе безаш хилар бахьан долаш! – белгалдаьккхар Марета.
Цо ма аллара, чIоагIа сатем-сабар долаш хила веза, цу тайпара болх кхоачашбеш вола саг. ХIаьта цо даь маьждиг тахан дукхане хетт. Марета дукхагIбола болх Пятигорске дIахьош хиннача Къилбаседа-Кавказа «Машук» яхача форуме гойта бихьар «Ассоциация молодых ремесленников» яхача проекта кулгалхочо Галайнаькъан Адама. Марета говзал лакха хилар белгалдаьккхар цига гулбеннача наха!
ДIахо а цу тIехьа къахьегаш, ший говзал лакхъеш болх бе уйла йолаш я Марет.

Новрузанаькъан Макка

№129 (12065), ера, 30 август, 2018 шу / Четверг, 30 августа 2018 года

Добавить комментарий

Ваш e-mail не будет опубликован. Обязательные поля помечены *