«Сийрда хийла вай урамашка массахана а!»

Дукхача шерашка цIена къахьегаш, напагI доаккхаш, дезал кхебеш яхаш яр тха гаргара саг Фатима. Советски Союз йолча хана Майскерча консервни заводе болх беш яр из, кыча юртара хьаухаш. ЧIоагIа лерхIаме объект яр из балха хиннар. Ерригача Союзе дIа-хьа кхохьийтар цига башабехкаш бола сом, баьцадаараш, кхыдола даараш, эскара а тIехьа кхоачам беш. Болх селла алсам хилар бахьан долаш завод дийнахьа а бийсанна а соцаш яцар. Цунга хьажжа болхлой кхаь сменагӏа бийкъа ухаш бар балха. Iуйрийна 8 сахьат даьлча, сайрийна 4 сахьат даьлча, бийсан 12 сахьат даьлча.

Иштта цхьан гуйран бийсан кхоалагIча смене балха яхаяр Фатима. Бакъда, ахбийса яьнначул тIехьагIа сахьат доаллаш, завод свет йоацаш а йиса, болх ца хулаш цIабоалабир кхоалагIча смена доакъашхой лаьрххӏа оттаяьча автобусо. Вай къахьегамхочун автобуса тIара Iояьлча цIенга кхаччалца ахкилометр гаргга никъ бе безар дукха сийрда йоацача, наггахьа мара лампа ца ягIача новкъа гIолла. Вешта, масса хана санна бархӏ сахьата болх баь Iуйрийна цIайоагIаш хилча-м сахинна сийрда хургьяр.
ХIаьта тахан ер йоагIаш хиннар шевар вижа ха яр. Наькъ тIа цхьа адам дацар. Массане а наб ю ха ма йий из. ВIалла цIагIа ца Iеш йола укхан новкъост Соня а, тахан ца йоагIаш йисаяр, футтаройна санна. Ше цхьаь йоагIар Фатима, цакхера гIерташ. ХIанз санна дIатоха телефон хилча-м, шийна духьал саг вехаргвар цо. Ховш яр из, цу наькъ тIа МотIаь яха жIалий нийсдала тарлулга. Из дар нахах леташ да, аьнна, цIи хеза.
Иштта йоагIаш аханахьа кхоачашехь цун бIаргаша гаьннара зийра из кIай жIали, наькъа дехьа жена йисте, дукха гаьна доаццаш улаш. Каст-каста, жа лорадеш санна, царна юхе хулар из хьалха а. Цигга Даьла цIи а яьккха, шорттига сехьа наьха коанаIар тIа доаллача гIанда дIатIаяха, Iохайра Фатима. «Мегаций, шоай жIали дIадехка», – аьннна хетар цунна. – «Фу бала ба акхар нахага бахьар? ПаргIатта хьал-Iо тӏехвала ца вуташ», – йоахар цо дагахьа, йиш еха. ХьатIахьаде, карта тӏехкхоссаяла уйла яр цун. Вешта са хиллалца ягIа лаьрхӏар миско. Iуррехьа ер наIар тIа ягIача коара божа дIалалла араваьннача саго дIадоаккхарг ма дий из жӏали, аьнна, хетар. Цар дар из укхан балийна даьнна МотIаь.
Ше кхераяьчун бIарг тIера ца боаккхаш вай къахьегамхо ягIаш шиъ даьлар, кхоъ даьлар, сатессар. Бакъда, тоъал сердал яьнначул тIехьагIа ер кхераш хинна жIали, Iоулаш модж а йолаш, шорттига ший мочхал а хьекхадеш, укханца вIалла бала а боацаш улаш дар. Оаш кхета ма дарра, из хиннаяр бодж.
Из газа йолга хайначул тӏехьагIа ше леладечох елаенна дIахо яхар Фатима, «Дала дIа ма яккха хьо, «Гузи», хьо хиннаяр из», – аьнна. Сагах бехк боаккхилга а дацар, хайра йоацача лампаех мара.
Цу хана денз Фатимас массаза а оалар, «Сийрда хийла вай урамашка массахана а!» – аьле.

Бохтарнаькъан ХIарон

№154-155 (12090-091), ера, 18 октябрь, 2018 шу / Четверг, 18 октября 2018 года

Добавить комментарий

Ваш e-mail не будет опубликован. Обязательные поля помечены *