ЦIенал дика я, миччахьа яле а

ЦIенал – сага унахцIена вахара куца керттера дакъа да. Бусалба саг хIаьта а хила веза цIена. Сага Iалам, цун чухье цIенал эшаш я. Шийца цIенал йоацаш дукха ваха могаргдац сага. АллахIа цIена волаш кхеллав саг. ЙоагIа цIенал ца лелайича, сага организм сиха талхаргья. Бусалба Iилма дийшача наха хьаяхачох, Дала Къуръана чухьа хьоахабаьб цIенал лелаеш бола нах, АллахI цIенлуш бараш дукха безаш ва, аьнна.

Саг ше цIена хила а, ший дезал ишта Iомабе а декхарийла ва. Даьла салам хилда цунна, даьла Элчас аьннад йоах: «ЦIенал – ах дин да», аьнна. ТIаккха вай бусалба хилча, вай дезал а ишта кхебе беза вай. ХIаьта бIехача метте жинаш, харца хIама гуллу, аьнна ма дий. Дала лорадолда вай цар зенах. Ший цIагIа цIенал лоаттае декхарийла ва хIаравар. Нагахьа санна кхалсага хьаькъал, низ дIа ца кхоаче, маIа саг ше оарцагIвала веза цу гIулакха. Кхы мел дар дIадаьлча, во лазараш гуча ма дувлий бIехача метте. ВIалла эхь тIакхоачаш хIама дац, маIача саго ше вахача метте цIенал лоаттайича.
Цхьайолча хана вай мехкал арахьа, Россе шахьарашка нийслу со, цхьацца гIулакха дIа-хьа вахе. Дукха ха йоацаш ишта ваха нийсделар са. Цигара юха цIавоагIаш никъ кхыча тайпара а нийсбенна, вай мехка гIолла чакх а яьнна йодача маршрутни машинаца ва вийзар са. БархI сахьат ха машена чу а яьккха, Кропоткино яхача городе кхаьчача, кIаьдденна а долаш, тхо сайцар «Горец» яхача салаIа а, хIама даа а сувцача метте.
ХьатIаховшале наькъахочун доагIа ламазаш даьдале а, тIехьа тIадоагIачар ха эттаяр. Шоай дин, шоай Iадат долаш хиларах арахьара нах, ламаза лаьрхIа кийчьяь моттиг хургйий-те укхаза, яхаш, уйла еш, сагота долаш тхо Iодаьлча, бIарг сийрдабаьлар тха, геттара дега салоIам хилар цига лаьттача лостамах.
Ламаза цIено е а, эца а, хьаде а лаьрххIа терко тIаяхийта яь кийчо яр. ВIалла саг а хиннавий-хьогI укх чу, аьнна, хеталуш, тамашина цIена яр чу мел ваьннача, салаIа соцача наIарга автобусашца тхол хьалха а тхоца кхаьча а дукха адам доллаше. Мишта вIаштIехьадоал акхар ер цIенал иштта лоаттае, аьнна, хеталуш, лостам бар массанахьа. Гуш дар, цу метте лаьрххIа кулгал делга. Из паргIато еннача Далла хоастам кхайкабир аз. БIайха хаоттам болаш, бIаьхача новкъа даьхкача тха чIоагIа сапаргIатдаьлар цигача. ХIана аьлча цхьайола цу тайпара моттигаш хул, хилар мара, кхы цхьаккха оттадаь низам доацаш. ЙоагIаш во хьаж йолаш, лелаш жIалеш долаш, халла мара ког Iоловза цIена моттиг йоацаш, бакъда, шоаш деча гIулакхах бизза мах бехаш а хул уж цу хьал тIа болаше.
ЦIадахка арадовлача дийнахьа бусалба наха деза дола, Дала къахетам беш дайта «Iашура» яха ди а долаш, марха хиннадар тха оаха бахьача новкъа. Сайрийна 18:30 даьлча ха а хинна хурмайца, хица марха дастар мара, хIама даанза дар со а са новкъостий а. ХIаьта тхо салаIа сайцача хана бийсан 11 сахьат доалаш латтар. ГIаххьа меца а дар тхо.
Ламазацара болх паргIатта чакхбаьнна, ламаз даь долаш-м, юача хIаманцар яр-м кхы йоккха сагото яцар, аьнна, хеташ, эгIа чу тхо Iочудаьлча, хIама дуа моттиг яр йоккха. Болхлой а бар, тIехьарча технологеца кийчдаь вайнаьха бIарзкъаш а дувхаш. Гаьнарча шахьарера, бовзаш боацача наха юкъера цIадоагIача тхона геттара хоза хийттар из сурт. ЦIена лостам болаш яр Iохов моттиг а. ВIашагIъийна доацаш, ше-ший метте дар шедар: хIама дуа, хьакийчду, хьалу моттиг, хьожаш хIара саг волаш, тIехдика лостам болаш яр. Дика гIулакх а даь, хьадахкийтар тхо фусам-даьша.
Беррига хоастам АллахIа ба. Дег тIара баркал ала лов наькъахошта совца а салаIа а иштта моттиг кийчьяьчоа, цига Iунал деш, ишта хоза лостам а хулийташ из лоаттаечоа. Дала сий долда наха гIо мел дечар!
Ер аз хIана дувц аьлча, цу тайпара моттигаш лелаеш болча наха цох хьокхам хилар, вайна гонахьа цIена хилар догдоахаш. ЦIенал дика я, миччахьа яле а.

И. Айюбов

№156-157 (12092-093), шоатта, 20 октябрь, 2018 шу / Суббота, 20 октября 2018 года

Добавить комментарий

Ваш e-mail не будет опубликован. Обязательные поля помечены *