МалагIа пайда е зе доал «WhatsApp» яхача приложенех?

Наьха дукхалга а хьажача, тахан латтача вахара хьалага а хьажача вайна юкъе чIоагIа эшаш хIама я телефон. ХIаьта цунга низ ба, моллагIдолча хIамангахьа дика а во а дIа-хьа доаржаде. Пайда а зе а эца йиш я цунгара.

Тахан дунен тIа эттача хьала тIа телефон йоацаш мегаш бац дукхагIбола болх а кхыдола гIулакхаш а. ХIана аьлча чIоагIа накъайоалаш хIама я из, цунга гIолла дукха хIама кхоачашдеш. Доккха ниIмат деций кхыча паччахьалкхе ваха хьай гаргара саг фу деш ва, могаш-маьрша вий хьажа хьога йиш хилар, из волча ваха машен оттаъе а цох фу хиннад ца ховш из дагавала а ца везаш хилча!
Духхьала дIа-хьа тохаш къамаьл дар а доацаш цу телефонаца кхы а дуккха низаш да, массала ВацАпп яхаш цхьа приложения я. Сага сурт-сибат а сага оаз а, саг хьахьокхаш видео а го йиш я цу чу гIолла. ХIаьта, моллагIа хIама диканна лелаерах тарра вонна а лелае аьттув ба сага. Мишта аьлча, уж сурташ, видеош дIа-хьа кхахьийтарца во дала йиш йолаш да нахагара царна шоашта ца а ховш. Нагахьа цу сурта тIа, е видео тIа, тоам боаца хIама дале, нах шоайла айхьаза боахаш, тIехьенна во дар Iомадеш хIама да из. Цудухьа уж сурташи, видеоши дIа-хьа кIезигагIа кхахьийтача бакъахьа хургьяр наха. ХIана аьлча, бусалба Iилма дийшача наха хьаяхачох, царех хIара къа хулаш долча хIамах из дIа-хьа мел тессачунна а иштта цунга мел хьежачунна а хулаш дола къа хилар кхерам ба, нагахьа цо из доарждар духьа тоссе.
Цкъа тика чу хьачуенача йоIо: «Интернета карташ дий шуга», — аьнна хаьттача, из дIахезача цу чу нийсвеннача воккхача сага аьлар: «Даьллахьий, йиIиг, хьо моргача кагирхошта ма эшаш хIама яц-кх из вацапп», — аьнна. БоккхагIашта массаратна а мотт из вацапп яхар духхьал во хьадоалаш хIама я. Цар а бехк бац, моллагIа хоам хезача, «Вацаппача сообщени яйтаяр» ма оалий вай, хIаьта хоамаш дерригаш а хоза дараш хезац, тIехьарча хана хIаьта а, цудухьа унзара хетт царна из вацапп яха дош. Бехк баккхац аз цу воккхача сагах, фуннагIа даь а вай кагирхой воча хIамах лорабе гIерт уж.
ХIанз моллагIа хоам минот ялалехьа дIа-хьа бода дерригача дунен тIа вацаппа чу гIолла. Иштта водар а дода сиха. Со цецвоалаш цхьа хIама да айхьаза, тоам боаца хIамаш сенна кхувс наха шойла дIа-хьа? Вайга хаьттача вай къаман нах цIаккха а мича хиннаб во къамаьл деш, ийрча гIулакхаш леладеш. Дукха дайнад сона боккхий истий, цар моарой бела а белаш, сакъердаме а хеташ цу тоам боацача хIамашка цу приложенешка гIолла дIа-хьа кхувссаш багIаш. Цхьаькха а доладаьд кагирхоша, цадоагIа во ловзар а деш, из телефона тIа хьатIа а доахаш, из дIа-хьа тувсса болабеннаб массанена а гургдолаш. Ма дарра аьлча эсала, кIезига гIулакх да-кх из. хьоа ма дарра вай къаманга доагIаш хIамаш дац-кх уж. Бакъахьа дар воашта эшар хьа а ийца, ца дезачох лоралоре. МалагIа хьехар да дас-нанас дезалашта дер. Наха юкъера эхь дIадаьлча, къа ма хулий иштта хьувзарах адама.
Сакъердама ший да, нана, даь-да, даь-нана хьатIа а боахаш из дIа-хьа тувссар фу гIулакх да, мегаргдолаш хIама дий из?! Из сурт дайча хьо дика ца вовзачо «Даьллахьий къавеннача дийнахьа укхо леладер фуд? — аьле, е кхыдар аьле хьона а шийна къа ма дой. Иштта гIийбат а ма даржий вайна юкъе. Шуга хетт аз хьамсара «Сердало» дешархой, бусулба наха юкъе мегаргдолаш хIама дий из?!
Дукхача хIаманна накъа йоалаш хIама я Вацапп. ХIаьта, цох хьабоалача пайдал дукхагIа Iа къа деш хилча сенна эш из? Селла сагота доацаш сенна хьувз вай, цу хIаманна уйла ца еш. Ер Iодийшача, боккъала дехар да са, тесса а ца дуташ, теркам а бий, шоай цIен нахага кхайкарал де, къинош кIезигагIа дергдола оагIув е.
ТIехьарча хана нохчаштеи гIалгIаштеи юкъера доазув къоастадирах вай мехка латташ дола хьал дика хов вайна. Митинге арабайнача наха а, кхычахьа болчар а, боккхийча наха а дукханеш шо-шоашта хетар оалаш къамаьлаш даьд. Тешаш хургда вай хIаравар мехка дикадар хилча бакъахьа хеташ хинналга. Бакъда, наьха къамаьлашта юкъера адамашта юкъера барт бохаргбола къамаьлаш хеда а деш, уж доаржадеш а нах ба уж наха дегазабоахаш, ийрча боахаш. Цох вайна зе доал. Даьла къахетамца, барт-цхьоагIонца, кхы саг лозаваь хIама доацаш чакхяьннай уж митингаш, амма цхьаццабола нах дегаза боахаш роликаш еш уж, вацаппе гIолла йоаржаеш дукхаш ба хIанз а.
Цхьаькха цхьа хIама да даьржа. Мичара ба а ца ховш бай хоам хьаотт, «…хьай Дьала духьа массехк сага дIачу-хьачу тасса ер, ялсмала гIоргва хьо, Iа ца тоссе къа дергда Iа», яхаш. Из а, ца эшаш во гIулакх да. Нах кегабу цу хIамаша. Бокъонца маьлбар къадар фуд ца ховчо ца кхийсача бакъахьа ба из мо бола хоам дIа-хьа. Воай дезал лорабе беза вай воча хIамах.
Вай хIаране ше леладеча гIулакхага хьежжа уйла йоре бакъахьа дар. Диканна а вонна а хьалхара Далла хьалхашка жоп дала дезар вайх хIаравар ма вий.

И. Айюбов

№158 (12094), шинара, 23 октябрь, 2018 шу/Вторник, 23 октября 2018 года

Добавить комментарий

Ваш e-mail не будет опубликован. Обязательные поля помечены *