Нане фаьлгаш

(берашта)

Нане хIара сайранна фаьлгаш дувц ший къонгий берашта. Наггахьа цун мехкарий даь-цIа баьхкача, цар бераш а бийса яккха дисача нане фаьлгашка ладувгIаш хул.
ЦкъаьннагIа нане хьалхагIа бийца фаьлг бувца болабича, из Iа хьогга бийцабар оал бераша. Цудухьа хIара сайранна керда-керда фаьлг бувц йоккхача сага. Тховсара шин йиIий а кхаь виIий а зIамагIдола цхьайтта бер да царцига бийса йоаккхаш. Шоай нани дукхаеза берашта. Уж тхьовсаде ловш шиъ фаьлг бийцаб цо, хьалхагIа цаI мара бувцаш хиннабеце а. Цхьабакъда, цох хIама хилац, берашта лов цо кхы а фаьлгаш дувцар. Цхьан моттиге дукхха вIагIкхетар дале е фаьлгий турпалий оамалаш йовза ловш хилар дале а наб йоагIаш дац берех цхьаккха а. Фаьлгаш дийца ца Iеш сихаоаларгаш, дагардергаш, ховлеш-довзалеш дийцад нане. Кхыметтел тхьовса тарлургбар ераш аьнна хеташ, ага-иллеш а даьхад цо. Бакъда, берашта наб вIалла гарга а ягIац.
Цул тIехьагIа нане бувца болабу, берашта вIалла а хеза боаца тамашне фаьлг:
— Дала шоана дика дувцарг, дикаца шо сашорта дахарг, вонна тIехьатеттарг, диканна хьалхадахарг, вахаш-текъаш хиннав Фаьлги Фулги цIераш йолаш ши воша. Фаьлг веннав. Фулго богIа де торо йоацаш, мекха гарг яьшай. Таьзет долга хайна, кодаме бенача кхокхо ност йийнай, керо ткъам бийнаб. Кер хьун-керта дахад. Хьун-корта хьаста тIакхийттаб. Хьаст лекъаб. Цун лоалахара сесаг хий эца яхача хана, хьаст фу бахьан долаш лекъаб хайча, Iойитта шийгара цIаста кIудал йохаяьй. Чуеча хиннар ший цIен-даьга мадарра дIадийцад цо. Фусам-дас ше хьадеш ваьлла ворда цIа дохадаьд, диг дийтта. Иштта вахарах бехаб уж, Фаьлг валарах.
Бераша нанега лерг дилла ладувгIа. ТIаккха Марема оал наьна-наьнага:
— Нани, цхьа фаьлг, духхьал цхьаькха цаI бувцал хьай тхона.
— Дикан-д, бувцаргба, тховсара кхы бувца а ма алалаш, — оал йоккхача сага.
— Мегаьд, — оал бераша цхьатарра, ладувгIа кийч а луш.
— Яхаш-текъаш гаьнарча мехка я, инкал миссел тенна борз, кад-каддал бIаргаш а дола, паьшк-паьшкал лергаш а дола, Iалаьмате цIимхара борз. Ах-бийса яллалца ца тхьовсаш дола бераш лечкъадеш я из. Живарий тхьовсалаш нане бералгаш. Нагахьа санна из борз хьайоагIе, са бераш наб еш ухк, мерза гIанаш а гуш, аргда аз.
Цигга шоашта Iодехкача метташка Iодувш бераш. Цул тIехьагIа метта юккъе ура а хайна Хьасана оал:
— Тхо тхьайса ухкача хана дIахьоргдий цо, нани?
— Ай, мичара, набарах доахкача берашта гаргаяха магац цунна, цо лечкъадераш тхьовсанза дола бераш да. Аз шо дIадохьийтаргдац цунга, тхьовсалаш чехка, — оал йоккхача нане. Цул тIехьагIа ага-илли ала йолалу из.
ГIараш ма елаш, бераш тхьайса ухк шоана.

С. Заамиев

№ 6 (12141), шоатта, 19 январь, 2019 шу / суббота, 19 января 2019 года

Добавить комментарий

Ваш e-mail не будет опубликован. Обязательные поля помечены *