Къамашта юкъера барт чIоагIбар

ГIалгIайчен арахьарча бувзамийи, къаман политикани, зарбани, хомийи министр волча Яндакъонгий Муслима вIашагIкхетар хилар Къилбаседа ХIирийчен муфтеца Гацалов Хьажимуратацеи, Пригородни районе чуйоагIаш йолча Гадаборшкъонгийи Яндакъонгийи юртий да волча Хазнаькъан ИбрахIимацеи.

Айдаьча хаттарех керттерчарех цаI дар, гIалгIайи хIирийи лоархIам бола кагий нах чубоагIаш йола юкъара къонбарий совет вIашагIйоллара хьаькъе. Уйла я, цу совета доакъашхошка бахача наха юкъе нийслушдола моллагIа къовсамаши, иштта машенаш вIашкаетталуш наькъа тIа хулаш долча хатарехи дола хаттараш шинна къаман нах юкъе а болаш юстара дахийта.
Яндакъонгий Муслима цу апарах даьча къамаьла раьза волаш геттара из дош хьаллаьцар хIирий муфте Гацалов Хьажимурата. ГIалгIайи хIирийи къамашта юкъера гIулакх чIоагIдеш, латта хьал аттача доаккхаргдолаш, тахан воай вахаре вай баккха безаш бола гIа ба из, аьнна белгалдир цо.
Иштта Муслима даьшхар 1944 шера февраль бетта 23 дийнахьа шоай цIеношкара ара а баьха нах Сибире Iобахьийта укх шера 75 шу дузаш хилар. Цу гIулакха хетадаь малагIча тайпара даглоацама вIашагIкхетараш дIахьоргдолаш да Къилбаседа ХIирийчен доазон тIа аьнна хаттар айдир цо. Цу тIехьа Муслима белгалдир, моллагIа мовлаташ дешара а, дулх, сурсат е кхыдола хIама даларца сагIа декъара а эшача дакъа лаца кийча ва ше, аьнна.
Гадаборшкъонгийи Яндакъонгийи юртий да волча Хазнаькъан ИбрахIима дийцар, Гадаборшкъонгий-Юрта доттагIала салоIама моттиг – сквер дружбы е уйла йолаш ба шоаш, аьнна. Цул совгIа, цар лерхI цу сквере чуйоагIаш берийи, культура даькъеи майдаш е, иштта 200 совггIа, сом луш йола гаьнаш дIайогIа а. Цу хаттаргахьа а эшача гIулакха гIо де кийча ва ше аьлар Муслима.
Иштта вIашагIкхетаре айдир Пригордни районе цхьана, юкъара ярмаркаш дIакхахьарах дола хаттар а. Белгалде деза, цу тайпара ярмаркаш дIакхахьара поалхам болаш хилар. Иштта хьалха дIакхьихьача ярмаркашка хинна хьал а дагадехар гулбеннарашта. Хьоадаьчох, хьалха хиннача ярмарке шинна а оагIорахьара боккхий нахи, кагий нахи хиннабар цига дакъалоацаш а шоайла къамаьлаш деш а. Шийга хаьттача керттера дар да из, аьнна белгалдир Муслима. «Цу тайпара вIашагIкхетараш дукха ахча эшаш дац, бакъда, вай халкъаш гаргаозара лерхIаме дош да из. Цудухьа, сона бакъахьа хет цу тайпара гулдалар кастагIа дича, — аьнна белгалдир гIалгIай министра.
И. Айюбов

№ 8-9 (12143-144), ера, 24 январь, 2019 шу / четверг, 24 января 2019 года

Добавить комментарий

Ваш e-mail не будет опубликован. Обязательные поля помечены *