Басарий мотт ховра цунна

Укх шера 70 шу дузаргдар суртанча Барханоев Iаббаса Iийса вича денз, бакъда, из вайца воаца дикк ха я. Iийса сона зIамига кIаьнк волча хана денз вовзар.

Цу хана 8-9-ча классе хила мегаш вар со. Сайна меттел, ерригача Наьсарен а из вовзар аьнна хет сона. Ювцача заман чухь района милице цаI мара керда яьнна «уазик» яха машен яцар, ПМГ аьнна йоазув тIадолаш. МоллагIа хIама хьаийккхача: латаш бале, малар менна гIар еш бале, кхыдола зулам дойя – цу сахьате гучаэккхар ювцаш йола машен. ХIаьта цун водитель вар дегIа хьаьрча, куц-сибат дола, милице гIирс бувха зIамига саг. Барханоев Iийса вар из. Кхувш боагIа дуккха кIаьнкаш хьагар цох, цар безам бар из мо майра хила, цу тайпарча хозача машена тIа болх бе, милице мугIарашка хила. Цхьабола милиционераш бIаргабайча, цар леладер зийча, уж а цар болх а дегазбоалаш нийслора. Амма Барханоева гIулакхаш, оамал цо беш бола болх безаболийташ, мерзбеш хулар. Кхераме болх бар цо баьр. Цу шерашка каст-каста нийслора нах боабеш, герзаш детташ йола моттигаш. Къаракъ мелараши цу тIагIолла довнаш доахараши геттара дукха хулар. Милице болхлошта човнаш еш а нийслора. Вешта аьлча, зуламхошта юккъе чуаха везаш дар цун хIара дийнахьара гIулакх. ЙIаьхача хана бир цо из болх. ДIахо Iийса, сурташ дехка вола а венна, дукхагIйола ха цу балха дIалуш вар.


Барханоев Iийса ваьв 1949 шера. Эскарера цIавеначул тIехьагIа, милице болх бешше, 1982 шера чакхйоаккх цо Махачкалера автодорожни техникум. Сурташ дехкача наьха хьокхамашка (выставкашка) из дакъа лаца волалу 1983 шера денз. Карарча хана цун цхьадола балхаш да вай республикан Т. Х. Мальсагова цIерагIча керттерча музее. ДукхагIа довзаш дола цун сурташ да «Лётчик-истребитель Оздоев Мурад» (1983), «Хьаста юхе» (1982), «Кура йоI» (1983), «Мехкахбахар» (1994). Цхьа-ши дош ала ловра Оздоев Мурада суртах. ТIема ветеран хинна Оздоев дика вовзар аьнна хет сона Iийсайна. Цкъа-дале, Сийлахь-боккхача Даьймехка тIема лётчик вахар Наьсарен милици йолча Трудовая оалача (хIанз Афганистане веннача И. Итазова цIерагIа я из) улица тIа. ШозлагIа-дале, Мурад болх беш вар ВДПД яхача цIера духьала къовсам лоаттабеча цхьанкхетара кулгал деш. Кхыча дешашца аьлча, шаккха зулама духьала къовсам лоаттабеш, наьсархой воча хIамах лорабеш вар уж.
Лакхе хьоахадаьрел совгIа, наха кIезига довзаш сурташ а да Барханоева. Вурийтта-барайтта шу хьалха айса болх беча Сурхо тIарча ООШ оалача ийс шера дешача школе музей е лаьрхIар аз. Дуккхача художникий, йоазонхой балхаш вIашагIкхийтар. Цхьан сарахьа Iийса волча вахар со. Из вахар пхезза вIаштIардаьча Наьсарерча Московски улицагIарча цIагIа. Со дика тIаийца, ший цIагIа латта сурташ довзийта волавелар Барханоев. Тахан санна дагадоагIа сона цун «Кобра» яха сурт. Къаьстта а теркам тIаозаш бар бIехала бIарг, лепаш долча кIигах баь бар из. Иштта сона дайзар Зязиков Мурада сурт. ХIаьта са безам тIабаха «Беттала бийса» яха сурт совгIата делар цо хургйолча тха музейна. Школерча музейна совгIата лу аьнна цо кулг яздаь из сурт хIанз, чуухача наха хоза хеташ, езагIча моттиге хьалтеха доалл. БIарга мел гуча хана, цо дагавохийт Яндарера денал дола, догцIена хинна зIамига саг. Iийса кхелхав 2002 шера. Цу шера цунна еннаяр вай республикан халкъа суртанча яха цIи. Кхы а ши шу даьлча (2004) «Карахдаьннарех» яха орден лу цунна. Барханоева уйлаш яха йисай цун сурташка.

С. Арчаков

Сурташ тIа: И. Барханоев;
цо дилла «ТIоха къонгаш накъабоах» яха сурт; «ЙиIий сурт».

№ 13 (12148), ера, 31 январь, 2019 шу / четверг, 31 января 2019 года

Добавить комментарий

Ваш e-mail не будет опубликован. Обязательные поля помечены *