Фусамаш Iалашъяра гIулакх дегIадоаладар

Россе Паччахьас Путин Владимира тхьамадал а деш Татарстана Иннополис яхача Россе эггара къонагIйолча IT-шахьаре паччахьалкхен совета шердаьча вIашагIкхетар дадихьар, «Жилье и городская среда» яхача къаман проекта хетадаь.

Ховшар хьаделлаш Путин Владимира белгалдир, карарча хана цIенхашта хувцамаш хулаш долга а, вахара гIишлон боарама хьал хувцалуш хилар а. Дувца дош да вахара хьал тоадаргахьа дола гIулакх къоастадар, дIахо йодача хана шахьарашкара а юрташкара а вахара хьал дикагIа тоадергдолаш. Цул совгIа, наха баха хьалъергйолча гIишлон боарам тIехдика хургболаш, цунна тIакхачар лакхача боараме айдар а дийцар.
«Июль бетта 1 дийнахьа дIайолаеш я вахара гIишлошта ахча дIахьожадара керда схема. Цунга хьежжа, къаьстта белгалъяьча проекташта кредиташ даларгахьа дола банкай гIулакх а айлургда, иштта гIишлон балха тIахьожам а хургба. Правительствона а, керттерча банка а терко е ловра сона, гIишлош ечарцеи, кредитни юкъарченашцеи хоаддаме болх дIабахьабезаш хилара. Из болх лерттIа чакхбаргболаш, цу тIехьа кийча хила еза банкаш болх хьабергболчарна доагIа кредиташ дIалургдолаш», — аьнна белгалдир, Паччахьас Путин Владимира.
Иштта цу доккхача вIашагIкхетаре дакъалоацаш хиннача ГIалгIайчен Мехкдас Баматгире Юнус-Бека ший отчета докладе хьоадир, «Жилье и городская среда» яхача къаман проектах 2019 – 2024 шерашка ГIалгIай Мехка 163 юкъара доазон моттигаш тоае лерхI, аьнна. Царех я 47 объект 2019 шера чакъяккха езаш. Хила мегаш долча федеральни бюджета субсиде боарам шера 146 млн сом ба. 2017-2018 шерашка «Формирование комфортной городской среды» яхача проектах мехка 59 кови, 21 юкъара моттигаши тоаяьй. ГIалгIайчен Мехдас белгалдаьчох деррига цох дIадаха ахча 198 млн сом да.
Иштта Мехкдас белгалдир 2019 шера II-III кварталашка, дехача цIеношкара нах кхычахьа баха дIачубохийташ йола программа кхоачашъеш я, аьнна. ВIаштIара даьча 13 цIеношкара нах дIачубохийтаргба, хIаьта кердача фусаме чугIоргва 422 саг. 2010 шера денз цу программах ГIалгIай Мехка дехача 68 цIеношкара нах дIачубахийтаб, фусама хьал тоадаьд 4 947 сага. Уж ба 1072 дезал.
Мел аьнначул совгIа Баматгире Юнус-Бека хоам бир, ГIалгIай Мехка фусамаш хьаяра гIулакх керттера да, аьнна.
«Мехка фусамаш Iалашъеш бергболча балхагахьа мехка проектаца баьча бартах 2019 шера мехка 344 эзар кв. м. фусам вIаштIехьаяьккха езаш я. Цул совгIа, фусама гIишлон балхаш кхоачашдарах йолча РФ мехкий программах боарамал совгIа кхы а укхаза 152 эзар. кв. м. фусам Iалашъе уйла я, 220 моттиг йола берий беши, 704 дешара моттиг йола школеи», — аьнна дийцар Мехкдас Евкурнаькъан Юнус-Бека.

И. Айюбов

№ 21 (12156), ера, 14 февраль, 2019 шу / четверг, 14 февраля 2019 года

Добавить комментарий

Ваш e-mail не будет опубликован. Обязательные поля помечены *