«ЦIаьрматалах цIи яьннай»

«ЦIаьрматалах цIи яьннай» яхаш цхьа кица да гIалгIай. Из дага дохийташ дола, цхьан сага даь хIама дийцар сога укх деношка цхьан новкъосто, сов цIаьрмата бараш вайна юкъе болаш хала хеташ.

Из хиннад «Мой сам» яхача машинаш юлача метте. Ховш ма хиллара, из я, ах мах мара бала ца безаш, машин ший йолча дас ше юлаш моттиг. Дика дагадеха хIама а да сога хаьттача.
Кулг бIехде ца дезаш хилча, киса ши кулг а делла латтачул дикагIа деций из тепча хьа а ийца, шийна еззача тайпара ший машин йолча дас ше Iойиллача. ДIалуш бола мах дIаэцаш аппараташ латт. Сов дар цу тайпара кассираш юхалуц, бакъдар аьлча. Цхьайолча хана, аргIа а отт цига. Цу моча метте вена хиннав дикагIйолча джип-иномарка тIа вагIа, тIахьажача хьал-таро дола саг. ВIаьхий хиннав-м ала йиш яц из, цо леладаьчох мел цунга таро яле а.
Аппарата чу ахча дIачу а тасса ший машин йилла эттав из. Дика чоп боаккхаш йила ма езза йилай цо ший джип. Ше машин мел цIена яьй хьожаш го а баьккха, тапч Iо а йилла, дIатIавахав из ше ахча дIаденнача аппарата. Табло тIа 3 тум лаьттад, совдаьнна. Бакъда, аппарат ахча хьадала лаьрхIа хиннаяц. Дита лаьрхIа-м джипа да а хиннавац. Тепча юха хьа а ийца, доладаьд цо хий ший машина детта уж кхо тума кхоачадаллалца. Иштта счеташ дIанийсса а яь, ше даьчоа раьза волаш дIавахав машина да. Шийна тIехьа аргIа лаьца латтар вIалла ца гуш мо.
ТIаккха фу аргда цо леладаьчох цIаьрматал ца аьлча. ХIаьта цIаьрматалах цIи яьнналга ховш ма дий вай. Цу цIаро кхаь хIама зе даьд. Цкъа-дале, хий зехьа доадаьд цо. ШозлагIа-дале ший ха йоаяьй ца доагIа хий детташ, кхозлагIа-дале, шийна хургболча маьлах ваьннав из. Совдаьнна ахча цо, тIехьа тIавоагIачоа, аьнна дита даларе Дала доадергдацар из, цун духьал цхьа дика ца яьздеш.
ВIалла шийна тIехьа саг ца хилча а, из ахча а дита дисачоа хьаьнала а дийца дIаваха валаре мегаргдар сога хаьттача. Тума кхычун дутачул из доаде кийча болаш хул цхьабола нах. Цу тайпара сакхетам бола нах кIезигагIа хилба вай халкъа юкъе.

Бохтарнаькъан ХIарон

№ 21 (12156), ера, 14 февраль, 2019 шу / четверг, 14 февраля 2019 года

Добавить комментарий

Ваш e-mail не будет опубликован. Обязательные поля помечены *