Котам

«Хьайбаех дола гIалгIай фаьлгаш», оттадаьраш Д. Мальсагов, Б. Зязиков. Нохч-ГIалгIай книжни издательство, Грозный — 1961 шу.

Цхьа боргIали, котами хиннад новкъа долхаш. Берца ши буртиг корабаьб цу шиннена. БоргIало ший бар дIакхаьллаб, хIаьта котамо шийна кхаьчар дIабийнаб. Цунах дукха а, дика а борц баьннаб, цхьабакъда ГIамо говрий рема тIа а лаьлла, хIалак баьб борц. Декхар хьадоаккхаргда аз, аьнна, тохаеннай котам. Цкъа а, шозза а хьадийхад цо шийна даь зе. ГIамо ладувгIа а тигаьдац. ТIаккха, е сай декхар хьадоаккхарг мад аз, е ГIама коа тIа Iаьрж долларг мад аз, аьнна, араяьннай котам.
Араяьнна йодача укханах новкъа борз кхийттай.
– Iа фу леладу, ва котам? – хаьттад берзо.
– Со даьра йода, – аьннад котамо, – ГIамо декхар хьалойя из хьадаккхеи, ханза ца лойя, цун коа Iаьрж доллеи.
–– Аз хье дIакхоалле мишта гIоргья хьо?
– Мишта йодац со, аз хьо дIакхоалларг хилча, – аьнна, зIок теха борз дIа а кхаьлла, дIахо новкъа йолаеннай котам.
ДIахо яьлча цогал кхийттад котамах.
– Iа фу леладу, ва котам? – хаьттад цогало.
– Со даьра йода, – аьннад котама, – ГIамо декхар хьалойя из хьадаккхеи, ханза ца лойя, цун коа Iаьрж доллеи.
– Мишта гIоргья хьо, аз дIакхоалларг хилча? – аьннад цогало.
– Мишта йодац со аз хьо а дIакхоалларг хилча? ЗIок теха цогал а дIакхаьлла, дIахо новкъа йолаеннай котам.
КхозлагIа духьал хий нийсденнад котама.
– Iа фу леладу ва котам? – хаьттад хиво.
– Со даьра йода, – аьннад котамо, – ГIамо декхар хьалойя из хьадаккхеи, ханза ца лойя, цун коа Iаьрж доллеи.
– Мишта гIоргья хьо – аьннад хиво, аз хье Iохьорг хилча?
– Мишта йодац со хьо а менна со дIагIорг хилча.
Iокхайдаь «xyпI», аьнна, хий дIа а менна, дIахо йолаеннай котам.
Яха ГIама коа тIа дIаэттай котам.
– Ва ГIам, – аьннад цо, – са декхар хьалу Iа, е лац?
– Доллел, бераш, – аьннад ГIамо, – эккхайийя дIа говрашта юкъекхосса из. Тхьовра ше дIакхаьлла хинна борз дIа а хийца, еррига рема хIалак яйтай котамо.
– Ва ГIам, Iа са декхар хьалу е лац?
– Доллел, бераш, – аьннад ГIамо, – эккхайийя дIа вай котамашта юкъе кхоссал из, цар зIокарч йийтта ювргьяр из.
Котам эккхаяь вокх котамашта юкъе кхессай. Ше тхьовра дIакхаьлла хинна цогал дIа а хийца, еррига котамаш хIалак яйтай цо.
– Ва ГIам, Iа са декхар хьалу е лац? – аьнна, кхозлагIа а мухь техаб котамо.
– Доллел, бераш, – аьннад ГIамо, – цу отарах цIи а техе, цу цIералла кхоссал из, цига йоагаргьяр из.
Отарах цIи а теха, цIералла кхессай котам. Ше тхьовра менна хий дIа а хийца, Iаьржа Iаьрж деллад цо ГIама коа тIа.
– Дутаргдац-кх со укхо, – аьнна декхар дIа а такхаь, дIаяхийтай ГIамо котам.

№ 22-23 (12157-158), шоатта, 16 февраль, 2019 шу / суббота, 16 февраля 2019 года

Добавить комментарий

Ваш e-mail не будет опубликован. Обязательные поля помечены *