ГIалгIай мехка почтацара бувзам

Интернет, укх дунен тIа мел йола телефон вай вахара юкъегIертаяле а, хIаьта а почтови бувзамах пайда эцаш ба дуккха вай мехкахой. Бакъдар аьлча, хоза а хет, сага ший кулгаца яздаь каьхат деча, цIай долча дийнахьа телеграмма е сурташца хоздаь открытка кхаьчача. Къаьстта а дикахетар хул цу тIа хьа мехкарча наьха е хозача моттигий сурташ латташ хилча. Россе почтови бувзама тайп-тайпарча шерашка арахийцача почтови маркаш тIа, каьхата бетташ тIа хиннад гIалгIай къаман дикагIболча къонгий сурташ, иштта гойташ хиннай вай гIалаш, шахьараш, бе-бе сийленгаш.

Царна юкъе а эггара хьалхарчарех бар аьнна хет сона революцен турпалхочун Ахриев СаIида ГIапура сурт тIадолаш хинна каьхата ботт. Цу тIа белгалдаьхадар цун вахара шераш. Ховш ма хилара, вай мехкахочо вахаш даьккхар 30 шу мара дац. Цул совгIа, цхьаькха моттиг а я СаIида ГIапур каьхата бетта тIа гойташ. Шоложа-ГIалий тIарча Коталон урам тIа латтар Н. Гиколо, А.Шерипов, ГI. Ахриев везвеш, цу кхаь турпалхочоа дегIа сийленг. Из сийленг тIадолаш а каьхата ботт арахийцаб вай мехкарча почта болхлоша. Вешта аьлча, юха а берригача мехка гIолла лелача каьхата бетта тIа гу вайна, ший зIамигача къаман ираз лехаш, ший вахар дIаденна вола саг. Цох боккха тоам а хул, хIана аьлча замаш хувцалой а къаман лехамаш эргадоале а, бицбе йиш яц цхьан хана мехка накъабаьнна нах. Уж Iоажал йолаш бац, наьха дагалоацамашка баха беззаш ба.
Иштта хоза моттиг нийсъелар почтан вахаре, гIалгIай халкъа поэта Яндиев Жамалдий 100 шу дузача деношка а. Цу хана арахийцар поэта сурт тIадолаш йола хоза марка. Из арахецар белгалдеш, цунна мухьар тоIаде вийха Магасерча почте со а хилар. Жамалда вовзаш вале а, цу марко из кхы а дикагIа дIавовзийтаргва кхыча къамех болча наха а тIехьа тIакхийнача ноахалашта а. Из марка бIаргаяйначул тIехьагIа, цун байташ еша а, вахарах лаьца довза а безам отта мег, хIанзалца из ца деш лийначар. Цул совгIа, сий долча поэта лерхIам бар санна хIама а хилар цох.
Цхьаццайола вай мехкара моттигаш а го йиш я маркаш тIа. Уж (хоза моттигаш) вайцига дукха я, лоамашка ядача юрташка санна, шаьрача Iоъараваьлча а. Царех цаI я шира гIалаш ягIа «ВIовнашки» яха юрт. Сага кхоллар тамаш йолаш, чоалхне я ювца гIалаш. Иштта уж хьалъе низ дIакхачарах цецвоал. Хашагульгов Iаьлас ший цхьан стихотворене тIа яздаьд, Мате гIала хьалъеш, цунна новкъостал деш шайтIа хиннад, аьнна. Цо из ВIовнашкарча гIалаех аьннадаларе а, саг цецваргвацар аьнна хет сона, иштта хала болх хиннаб тIоговзанчаша цига баьр. Цудухьа, цох тамаш еш, нийсъеннай из юрт Россе почтови бувзама марка тIа. Цул совгIа, лаьрххIа марка хетаяь хиннай тIема сийлен гIала йолча МагIалбика, вай мехка столица йолча Магаса а цун герба а, иштта кхы дIахо а.
Почтови бувзама маркаш а каьхата бетташ а «ткъамаш долаш» да, хIана аьлча оалхазараш санна лел уж, цхьан мехкара вокх мехка долхаш. Цар бовзийт вай мохк, вай къам, цун исторен а культуран а оагIонаш. ТIаккха дика болх ба-кх уж маркаш а бетташ а иштта арахеца дагадехараша баьр.

С. Арчаков

№ 28-30 (12163-165), ера, 28 февраль, 2019 шу / четверг, 28 февраля 2019 года

Добавить комментарий

Ваш e-mail не будет опубликован. Обязательные поля помечены *