Йоазонхой хьалхара цхьанкхетар

Укх шера 95 шу дуз гIалгIай къамах болча йоазонхоша шоай эггара хьалхара литературни цхьоагIа вIашагIъелла. Из хиннад 1924 шера. Цу тайпара хIама дагадехар а, юххьанца денз цун кулгалхо хиннар а Мальсагов Кураза Зоврбик ва. Вайна ховш ма хиллара, из, воккха Iилманхо хинна ца Iеш, йоазонхо а хиннав. Гаьнарча шерашка цо кхелла ши пьеса – «ЙоI йодаяр», «Пхьа» — тахан а шоай лоархIам бовнза, наха ешаш, школе ийслагIча классе дагIача бераша Iомаеш я. Дуккхача наха дагадоахка дешаш хиннад цар тIа гIеттадераш.

Хьалхарча литературни цхьоагIон чубоагIаш хиннаб гIалгIай йоазонца кулг шаьрденна а шаьрлуш боагIа а нах: Беков ДордагIа Тембот, Мальсагов Дошлакъа, Мальсагов Оарцхо, царех тарра кхыбараш. ДIахо дIайодача хана, цу цхьоагIонах хьахиннай йоазонхой Союз. Вай Сибре дигале, деша боккхий говзанчаш чубоагIаш хиннаб цунна. Царех хиннав Озиев Салман, Муталиев Хьажбикар, Базоркин Идрис, Зязиков Бахьаудин, Осмиев Хьамзат, Хамхоев Ахьмад, кхыбараш. ХIаьта Яндиев Жамалда нохчий а гIалгIай а йоазонхой правлене кулгалхо хиннав.
Ше хьахиннача хьалхарча деношка денз, вай къаман вахар хьагойта гIерташ, цун оагIув хьаллоацаргбола йоазонаш кхоллаш, хьабаьхкаб цхьанкхетара доакъашхой. Тахан царна юкъе я байташ, кIоанолгаш, дувцараш, повесташ, романаш, пьесаш, кхыметтел стихашца язъяь роман а. Республикал гаьнна арахьа йовзаш я Базоркин Идриса, Боков Ахьмада, Чахкиев СаIида, Гагиев Гирихана цIераш.
ГIалгIай къаьстта республика хьайича денз (1992), ГIалгIай йоазонхой цхьоагIонна керте лаьттав Вышегуров Мухьмад, Плиев Махьмад-СаIид, Чахкиев СаIид, Хамхоев Ваха. Карарча хана цунна кулгал деш я Дидигова Раиса.
Къаьстта са белгалдаккха безам ба, дукха ха йоацаш, вай мехка столице Москве Россе къамий вай заман литературанна чуйоагIача поэзе антологи арадаьнна хилар. Цунна дешхьалхе язъяьр ва мехка паччахь В. В. Путин. Шовзткъа вурийтта къамах бола поэташ юкъебахаб цунна. Царна юкъе йоагIаш йола шоай моттиг хьалаьцай гIалгIай поэташа а. Вешта аьлча, моцагIа Мальсагов Зоврбика хьакхелла литературни цхьоагIо, яхаш, къахьегаш, ший къаман литература дегIакхувлаш, хьайоагIа. Цунна дола тешал да, шерагара шу мел доал арадувлаш дола керда книжкаш.

№ 31-32 (12166-167), шоатта, 2 март, 2019 шу / суббота, 2 марта 2019 года

Добавить комментарий

Ваш e-mail не будет опубликован. Обязательные поля помечены *