Сакъердаме дувцараш

ПАЙДА БАЦ

— Даьла цIи яккха! Даьла цIи яккха! — яхаш, хьехар деш хиннад берда тIера лайжа ахка водача ший доттагIчоа цун новкъосто.
— Гаьнах тоссавеннав, хIанз-м яккха а езац! — аьннад шийна духьал нийсъеннача гаьнах тоссавеннача вокхо.
ХIаьта цо из оаллашшехь, укхун дозал ла а ца могаш, га кагьеннай. Ше юха а ахка водаш, новкъосто юха а детташ дола цIогIа хьахазача, хIанз-м яьккхача а пайда бац, яьхад йоах чуводачо.

ПИТАМ

МоцагIа-моцагIа хиннад из.
— Со лайла хьа! Хьа уна лайла со! — оалаш мара ший марага йистхулаш хиннаяц йоах цхьа сесаг, цунга из шийна сов чIоагIа дукхавеза моттийта дагахьа.
Башха цох тешаш воацача маро из гIулакх дIадийцад ший лоалахочунга. Цигача цар шинне соцам баьб, шун цIaгIapa цхьанне са эца Дала дайта малайк да со, аьнна, новкъост гIоргволаш.
Кхы саг цIагIа воацача хана чу а ваха, шоаш дийцача бесса, лоалахочун сесагага: «Шух шиннех цхьанне са эца дена малайк да со», — аьннад лоалахочо.
— Со-м гIийла я. Дика тоавенна, верста ва хьона са мар. Цун са эца хьайна! — яьхад йоах сесаго.

ЕР ЦИСК А ДААЛАХЬ

Кхерза чIаьпилгаши кIодари дуаш вагIаш хиннав цхьа хьоашалгIа вена саг. КIирвенна цунна бIарахьежаш, шийна цох яа хIама юсаргьяцар-хьогI яхаш, сатувсаш лаьттав фусамдаь зIамига кIаьнк.
Хьаьшо тIеххьарча чIаьпилга дакъа хьаийцача, кхы са а ца тохаденна, «Даьллахьа, хьаша, хIанз ер циск а дIадаалахь хьайна!» — аьннад йоах кIаьнко.

XIAH3 ФУ ХИННАД?

Гулбеннача наха.юкъе чIоагIа цIогIа хьекхаш, велхаш лаьттав цхьа зIамига кIаьнк.
— Фу хиннад хьона? ХIана велх хьо? — хаьттад цунга новкъа хьалвоагIача цхьан къонахчо.
— Пхи сом дайнад-кх, — аьннад кIаьнко.
Цунга цIoгIa ца хьекхийта дагахьа, кисара хьадаьккха пхи сом дIакховдадаьд къонахчо. ХIаьта из дIаэццашехьа кIаьнк кхы а чIоагIагIа велха волавеннав.
— Ай, хIанз фу хилар хьона? — хаьттад вокхо.
— ХIанз тума хургдар-кх сога! — яьхад кIаьнко.

ГIУЛАКХ МИШТАД?

— Мишта хет хьона вай гIулакхаш? — хаьттад ший лоалахочоа хьалхашка куравала дагахьа дика диа-менна цIавоагIаш волча цхьан саго.
— Паччахьа эпсара тара хет-кх! — аьннад цунна товр де ловча лоалахочо.
Цхьабакъда, цу дешаех дегабуам баьб вокхо.
— Аьъ, согара фу белгало яьннай хьона, цу тайпара къамаьл дувца? Хьай яле, хьаювцал! — цIенхаштта чугIертав из.
— Хьай, даьллахь, хIанз виталахь со! — дийхад из кIордаваьча лоалахочо. — Даьра, сона ховш, паччахьа эпсара тара долаш кхы хIама-м даллац хьох, араводаш гIумагIа ца кхахьар деце!

 

№ 31-32 (12166-167), шоатта, 2 март, 2019 шу / суббота, 2 марта 2019 года

Добавить комментарий

Ваш e-mail не будет опубликован. Обязательные поля помечены *