Фо цIена хилча са даха а атта да

Укх деношка Крепостерча больницера хьавоагIаш, геттара лотаенна йоагаш йокъаенна буц бIаргъйра сона. Из йоае гIерташ нах а бар цу юхе хьувзаш, МЧС хьайийхай шоаш йоахар цар. Со-м хIанз цох дувца валлац. Воалле а ца воалле а хIара шера ена бIаьсти хьаэттача вай дешдар да из, ишта бакъахьа да мотташ.

БIаьсти яьларца деррига Iалам сомадоалаш, дийнлуш доагIа. Цох гIаддаха да адам а дийнат а. Укх шера а бIаьсти яларца дукха цIараш етта наха тIа а яьнна латтача йокъаеннача баьцех, шоай бешамашкарча йоархIех, гурахьа гаьн тIара Iо а лийга, дисача гIаьнех, цхьаццайолча нувхех, ца эшаш сов йолча тIолхех. Вайга ладийгIача, дуне къоагадеш йоагIача бIаьстен цIена а долаш духьалдаха кийчлуш да вай. Цхьан оагIорахьа дика да ишта уйла хилар а цу наькъ т1ехьа вахар а, бакъда теркал е еза вож оагIо а – зе доалий цох е даллац? Вай зIамига долча хана денз бIаьстии гурахьеи наха йоархIашта а, гIаьнашта а цIераш етташ болх лелабу, из лаьттан йийхьара дика да яхаш, бакъда из вайна а, Iалама а доккха зе деш да.
Укх шера дукха йиттай наха уж цIераш. ЛаьрххIа, Iалами бунии лорадарах йолча министерства а МЧСа а болхлоша къахьегаш дукха йоаяьй цу тайпара цIараш дIа. Цхьавар дIааьнначох дIа ца кхеташ хул, цу мо болча нахаца хала да гIулакх леладе.
ТIехьарча хана дукха нах бетталу вайх, атта долаш е хала долаш онкология лазараш хиларца бала озаш. Хийцца цу вай йоагаеча нувхех хьабоалача кIураца дувзаденна хила йиш йолаш да из. ХIаьта лорашка хаьттача-м, цу йоагаеча нувхех, хьамчах дукха тайпара лазараш хул адамашта а дIахо дийнаташта а. «МоллагIа вай йоагаеш йолча хьамчах, пластмассах хьабоалаш бола кIур сигала урагIа боде а цох зе доал адама а, дийната а, баьцовгIанна а. ХIана аьлча, сиглара догIа, лоа, дарз IодоагIаш хилча, цунца дIа а ийя, лаьтта юха Iочубосса из кIур, иштта феца а дIаув из. Вай садоахача хана цу вай йоагаяьча хIамаех хьабаьннача кIурах йоахка микробаш вай пехкашка Iочуйолх. Цул совгIа, лаьттан тIара хьатIадоаллача хIаманца а дIаув из. ДогIацеи лайцеи юха IокIалдена хилар бахьан долаш, вай мелаш долча хих а дIаув из. Вайна кIезига да, аьнна хете а, кIезига-кIезига вай Iочу а дуаш, юххера дукха хьа а Iай, цхьаннена тIехьа кхыдар хьасов а доалаш, цох юххера а тайп-тайпара лазараш хьахул вайна. Цудухьа, хьамча доага а ца деш вай дитар дуккха а вайна гIойле йолаш да», – йоах Пхьилекъонгий-юртарча ГIалгIайчен онкологен диспансера врач хирург-онколог, пластический хирург волча Ужахнаькъан Сулеймана.
Аз йоахгаяьча цIерагIа-м доккха зе даргдацар, аьнна вайна хете а, цох хьадоалашдар доккха зе да. Вай из мел дукха дувце а, наьха сакхетам нийссача оагIорахьа хувца ца лой, хьабала пайда бац вайна. Цудухьа дехар да нахага, боккъала а уйла е укх гIулакха. ГIалгIайчен хоза Iалам толха ца деш, вай тIехьенна дитар, царга дIакховдадар вай массане а декхар да. Хьалкхувш йола вай тIехье унахцIена хилар воашта дезе совца деза вай уж цIараш ца етташ. Мел цIена вай мехкара фо дале а пайда бац, вай из бIехдеш хилча. Воашта Дала хьабенна ер хоза мохк лорабеш, ди тIехьа тоабеш, цIенбеш дIадаха деза вай. ХIаьта дага мел дехача вай цIараш етташ хилча из тоалургбац, мел хоза бале а.

И. Айюбов

№ 34-35 (12169-170), ера, 7 март, 2019 шу / Четверг, 7 марта 2019 года

Добавить комментарий

Ваш e-mail не будет опубликован. Обязательные поля помечены *