Цогали, боабашки

«Хьайбаех дола гIалгIай фаьлгаш», оттадаьраш Д. Мальсагов, Б. Зязиков.  Нохч-ГIалгIай книжни издательство, Грозный — 1961 шу.

Лоам кIал уллача цхьан юрта йисте Iам хиннаб. Ший кIоригий Iул тIехьа а долаш, Iам тIа лувча йодаш хиннай нана-боабашк. ЙоархIийла гIолла додача наькъа такилгах Iам тIа йодача боабашкаи, кIоригаштеи духьалдаьннад мецденна хьувза цогал.
— ХIанз-м дика че даьра доаккхаргдар аз, — яхаш хиннад цогал а батах мотт а хьекхаш, — хьалxaгIa нана-боабашк юаргья, тIаккха, цхьацца дIакхоаллаш, ховхача кIоригех чам боаккхаргба.
— Оаш фу леладу? — аьнна, цIогIа техад цогала боабашка никъ а хоадабаь.
Парт, аьнна, юхасацаь нана-боабашк юххьанца фу аргда а ца ховш йисай. Iо а теIабеш, юха а корта хьал а увзаш, ше кхераеннилга дIа ца хайта гIерташ хиннай боабашк. Бакъда тIехьайолхача кIоригий-м кхераенна бедаргаш а сайсаь, цIогилгаш а гIайттаь хиннад.
— Тхо даьра долх Iам тIа лувча! — аьннад нана-боабашко.
— Дика болх ба хьо сона нийсъенна, — аьннад цогала. — Сайна даа хIама лаха юрта даха карах ца доалаш лелар-кх со.
— Со хIана юъ Iа, ва цоги, — хаьттад боабашко, — сол а чам болашагI даа хIамаш хилча?
— Фуд из? — аьнна, батах мотт хьакхаб цогало.
— Из даьра да аз укх сахьате укх Iам чура хьона боаккхаргбола цIена чкъаьра.
— Кхы Iовдала а мичад со боабашка дулх а дитаь, шийла чкъаьра баа!
— Со-м мичча хана а яа кхуврг ма дий хьа, хIаьта цIена чкъаьра мичара бахьаргба Iа?
ТIаккха уйла яьй цогало: хьалхагIа чкъаьран чам а баьккха йиача фу дар-теш боабашк, — аьнна.
— Мегаьд, — аьннад цо, — хьаба хIаьта чкъаьра.
— Укх минуте, — аьннад боабашка, — оаха Iам чу Iочу а даьнна, хьа а лувцаш, хьалтIакхувсаргда хьона, хIаьта Iа, хьа а лехьадеш, даалахь.
— Мегаьд, сихагIа лела.
Из аьнна, цогал дIаюстара доаллашехь яха Iам чу лийлхай боабашки, цун кIоригаши.
— Вакъ! Вакъ! — яхаш гIараш а еш, корта хьалха хи чу Iочу а лечкъаш, ловзаш нек деш лелаш хиннай боабашкаш.
Берда йисте гIолла дIа-юха а удаш, саготденна лийннад цогал, цхьабакъда боабашко чкъаьра хьалкхоссаш-м хиннабац.
Цкъаза ловзадаьле, партте урагIкхувсалуш дола чкъаьрилгаш маьлха зIаьнарий сердалах къаьгача, багара шодаш Iоухаш хиннай мецденнача цогала.
Берда йисте гIолла лийнна, хьийза кIаьд а денна, ше-шийца аьннад цогало:
— Аз-м айса а лоацаргба чкъаьра, тIаккха боабашкий болх а бергба.
Кхоссаденна Iам чу ийккхад из. Хий тIехига да мотташ чукхоссаденна цогал, бухе дахад. Цхьа ха яьннача гIолла цкъарчоа хьалтIадаьннад из. Юха а, бага хий даха, бухе дахад.
— Нани, — аьнна, хаьттад кIоригаша, — хIана кхоссаделар цогал хи чу?
— Ший сутаралла кхоссаделар-кх, — аьннад нана-боабашко.
— Сенна эш цунна из сутарал?
— Сутара децаре-м цогал а хург мича яр цун цIи.

Кепа тоха кийчдаьр Матенаькъан Илез

№ 39-40 (12174-175), шоатта, 16 март, 2019 шу / Суббота, 16 марта 2019 года

Добавить комментарий

Ваш e-mail не будет опубликован. Обязательные поля помечены *