КIезига йовза тайпан цIераш

ГIалгIай тайпашта юкъе доккхагIчарех цаI да Йовлой тайпа. Вайна ховш ма хиллара, цун викалаш бах дукхача моттигашка: Ачалкхе, Iаьлий-Юрта, Наьсар-Керте, Эккажкъонгий-Юрта, Сурхо тIа, Яндаре, Наьсаре, Къаскима, Дошлакъий-Юрта, Аьлтий-Юрта, Ахкий-Юрта, кхычахьа. ТIеххьаръяр йиллар Йовлой Эже Ахк хиннав. Цудухьа оал цох Ахкий-Юрт а. Цу тайпан лоархIаш ба Абаьднаькъан, Арсмакнаькъан, Бузуртанаькъан, Элтемарнаькъан, ГIазгиренаькъан, Саганаькъан, Темербенаькъан, Мусенаькъан, Гелисханнаькъан, цхьабола Исмейлнаькъан, Довтгиренаькъан, Фетхилгнаькъан, ЦIокъанаькъан яха тайпан цIераш язъяйташ бола нах. Бакъда хIанз а цу тукхама берригача наха лелаю тайпан цIераш дIаязъяь а, техка а яьннаяц.

Масала, Хьадажнаькъан (Хадажев) язбайташ ба цхьабола Йовлой. Уж, сона дагадоагIаш, Наьсарерча Магистральни (хIанз Дж. Картоева) урамагIа бахар, №27 йолча училищен духьал. Из тайпан цIи юкъеяхаяц Дахкилгнаькъан Шукрес оттадаьча «ГIалгIай тайпан цIераш хьахилар» яхача книжканна. «Хьадаж яхача тха даь даь-даь цIерах дIаяздеш да тхо», — йоах Магасерча гIалан кулгалхо волча Хьадажнаькъан Мухьмада. Эггара хьалха из тайпан цIи язъяьр хиннав Хьадажа воI Хоасбот. ТIаккха цун къонгашкара виIий-къонгашка яьннай из. ХIанз цар а дезалаш хьахиннаб. Из язъяйташ бола нах дукхагIа хулаш боагIа. Хетаргахьа аьлча, тахан 10 цIа хила мег Хьадажах хьабаьнна нах. ТIехьа тIайоагIача хана из тайпан цIи а дIаязъергья аьнна хет сона вай къаман бе-беча тайпашца дувзаденнача книжкаш тIа.
Цхьаькха цхьа тайпан цIи хьоахае безам бар са укхаза. Дуккхача наха ца ха тарлу, малагIча тайпан нах ба Халгуев яха тайпан цIи язъяйтараш. 90-ча шерашка дар из. Аз болх беча «Наьсарен оаз» яхача районни газета редакце чувера, из тайпан цIи язъеш вола тIема ветеран, сержант Халгуев Жамалда. Из, духхьала тIема доакъашхо санна вайза ца Iеш, цхьацца лорал доаллаш а вар.
— Жамалда, — хаьттар аз, — малагIча тайпашца вошал долаш да шо?
Воккхача сага дийцар из тайпан цIи лелаеш ший цхьа цIа мара цахиларах.
— ТIема хана, чов яьяр сона, — аьлар цо. – Санчасте дарба деш волаш, цига дIаязъяь хиннаяр са тайпан цIи Халгуев аьнна. Тхо тхоаш Хьулахой да.
Вешта аьлча, тахан Наьсаре баха Халгуев язъяйташ бола массехк дезал, Жамалдий къонгех хьабаьнна ба, уж Хьулахой ба аьнна язбе беза, гIалгIай меттала дIаязбеш хилча.
Юххера, айса хьалха яздаьдале а, цхьа-ши дош аргда аз, Алисханов яхача тайпан цIерах лаьца. Уж а берригаш цхьан даьх Iарапханаькъан Аласханах хьабаьнна ба, тайпан Кукурхой ба. Аласхана пхи воI вар: Мухьмад, Башир, Сали, Йоакъап, Хьамзат. Салегара дIа мел ийккхараш болаш ба таханарча дийнахьа, Наьсаре бахаш ба.
С. Арчаков

№ 49 (12184), шинара, 2 апрель, 2019 шу / вторник, 2 апреля 2019 года

Добавить комментарий

Ваш e-mail не будет опубликован. Обязательные поля помечены *