Наркотикаша къам хIалакдергдоацаш

ГIалгIайчен Антинаркотически комиссес дIайихьача аргIанарча заседане дакъалоацаш хиннача ГIалгIайчен Мехкдас Евкурнаькъан Юнус-Бека, дIахо йодача хана наркоманена духьал къовсам лоаттабеш хьинаре къахьегара тIахьийхар комиссе доакъашхой.
Минздрава керттерча нарколога Ваделнаькъан Джамбулата баьча хоамах 2019 шера март бетта хьалхарча дийнахьа, мехка наркологически учете дIаязваь 1487 саг вар. Царех 244 саг диспансере учете латташ ва, вожаш 1243 профилактически учете ва. Цо яхачох, 2019 шера хьалхарча шин бетта ГIалгIай Мехка наркологически учете 25 саг дIаоттаваьвар. Уж дукхагIча даькъе 35 шу даланза бола къона кагий нах ба.

Евкурнаькъан Юнус-Бека белгалдаьчох, наркотически кхерама духьалара болх чIоагIбе безаргба. Цо яхачох, нийсбаь дIахьош бола болх, наркотикацара вай кагий нах хьакъоастабеш шийгахьа пайда болаш хила йиш йолаш ба. Иштта Мехкдас белгалдир, наркоманена духьала къовсам лоаттабергболаш, дерригаш цхьана дага а даьнна болх дIабахьа беза, аьнна.
«Наркотика йоаржаяра духьал къовсам лоаттабеш къахьегача кагирхошта мишта, мичахьа гIо-новкъостал де йиш я вай, хьажа деза. Хоам бара кечалаш юкъе кхувларца наркотикех доалаш дола зе доккха долга дIахайташ вIашагIкхетараш дIакхахьа деза. Иштта интернета юкъарча сеташка багIараш а юкъе озамегаргба, могаш, денал долаш, чIоагIа бола кагий нах наркотикаша мел чIоагIа сийза боах, цар вахар хIалак мишта ду хьокхамаш хьагойташ. Халкъа Гуллама депутаташа а цу юкъе дакъа лаьцача бакъахьа хургда, мехка школашка, ВУЗашка, СУЗашка багIача кагирхошца къамаьлаш деш», — аьнна дийцар Мехкдас.
Цул совгIа, юртий, шахьарий даьш а терко е еза цу гIулакха, моллагIа наркотикашца дувзаденна зуламе хIама шоай тIахьожамца юхе дутаргдоацаш, е юкъе доале хоададаь дIадоаккхаргдолаш.

Матенаькъан Илез

№ 50 (12185), ера, 4 апрель, 2019 шу / четверг, 4 апреля 2019 года

Добавить комментарий

Ваш e-mail не будет опубликован. Обязательные поля помечены *