Наьха могашал лораеш

Наьсарен керттерча рузбан маьждиге пIаьраска дийнахьа рузба де баьхкача наха юкъе дегIа могашал дика йоацаш а, массаза дегIаца дахаш дола лазараш дараш бий хьажа а, флюрографи яккха а лаьрхIа дIахьош шеръяь акци яр ГIалгIайчен поликлинике чуйоагIаш йолча «Здоровье» яхача медицински юкъарчено.

«ХIара шера апрель бетта 7 дийнахьа дерригачадунен тIа дездеш долча могашла ден хетаяь акци я оаха тахан укхаза дIахьош яр. Ерригача Россе санна, ГIалгIай Мехка а хIара шера дIахьош я из акци, мехка бахархошта юкъе могашал йоацаш бола нах малагIаш ба ха а, шоай могашала нах сагота хила безалга царна дагадохийта а. Къаьстта пIаьраска дийнахьа маьждига хьалхашка оаха ер акци яр бахьан да, укхаза Далла гIулакха де баьхка дукха нах хилар бахьан долаш», — йоах Мехка поликлинике чуйоагIаш йолча «Здоровье» яхача медицински юкъарчен терапевта Бузуртанаькъан Заремас.
Къаьстта укх маьждиге Наьсарен бахархоел совгIа мехкарча дукхача юрташкара баьхке нах хул. Цудухьа наха шоашка лораш хьажийтарал совгIа, цар дIахо болча нахага а лорашка дахе чакхдайле хьажийта шоашта аьнна хоам бергба. Укхаза хьадена чархаш тIа латта доккха ши цIа хIана дац ала машенаш яр, берригача лорий дарбан кхоачам шийна чу а болаш. Укхаза наьха аьттув бар дега, жимарашта ЭКГ, УЗИ яккхийта, пехкашта флюрографи яккхийта, иштта кхы дIахо йолча шоай дегIа маьженашка хьажийта а. Сага хила йиш йолаш мел долча лазарий бух тохкаргбола лораш бар укхаза хьабоалабаь.
«Сага дегIацара температура, цун давлени юсташ, дего, пехкаша, жамараша болх мишта бу хьожаш, дIахо сагот деш долча хIаман бахьан тохкаш терапевт а, кардиолог а, невролог а ба тха укхаза къахьегаш. Болчарна юкъера дикагIбола говзанчаш ба нахага хьажа баьхкараш», — аьнна дувц дIахо терапевта.
Акце дакъа лоацаш, лораш шоашка хьожийташ болча наха юкъе могаш боацаш а, шоашта лазар дий ца ховш а нах бар. Цу хьаькъе дувц дIахо Заремас: « ХIанз дIа цхьа воккха саг ва, тIехьарча хана корта лазбувл ший аьнна, Iохайна, оаха давлени хьайистача 220 я цун. Из ший лакха йий ца ховш лийнав воккха саг, корт а цудухьа лаз цунна. ХIанз цун лазара бух а тахка, дIахо ваха везача лорашта из тIахьожавергва оаха», — йоах ший балхах кайоаллача терапевта Бузуртанаькъан Заремас.
Ер акци дIахьош я Мехка поликлиника «Здоровье» яхача мидицински юкъарчено «Республиканский центр медицинской профилактики» яхача юкъарченца цхьана. Цул совгIа укхаза дакъа лоацаш волонтераш бар, ВУЗашкарча а, СУЗашкарча а медицински факультетай дешархоех латташ.
Маьждиге баьхкача нахага хила тарлуш долча лазарех мишта лоравала веза хоам беш, дуача хIамангахьа лораде дезар фуд, нагахьа ца моге эггара хьалха сага де дезар фуд хьалха доаккхаш яздаь шоашкахьа дарбан хоам болаш памяткаш дар волонтераша наха дIа-хьа декъаш.

И. Айюбов

№ 51-52 (12186-186), шоатта, 6 апрель, 2019 шу / суббота, 6 апреля 2019 года

Добавить комментарий

Ваш e-mail не будет опубликован. Обязательные поля помечены *