Къам лоаттадеча овлаех

ТIехьарча хана, шоай къаман хIама тахка, довза, цунца никъ бе чам болаш дукха нах нийслу гIалгIашта юкъе. Хийла цар къахьегам, цар хьинаре даь балхаш бахьан долаш шоаш мичара хьабайннаб а, шоай даьша леладаь гIулакхаш малагIаш да а, шоай къаман Iадаташ а довз наха. Цу тайпарабараш боккхагIчарна а кагегIчарна а юкъе кIезига бац.

Вай мехка дика йовзаш я композитор йолча Шадыжнаькъан Фаризай цIи. Цун къахьегама балхаш аз дувца ца дезаш довзаш да дукхача наха. Цо аьннар наха тIаэца, моллагIа, гIалгIай къаман да аьнна цо кердадаьккха хIама юстара ца дусаш халкъанца даха дус. Дукха ха яц Нальчике «Тетраграф» яхача издательстве цун кердача таптарашта кепа теха. Обложкаш тIа хоза сурташ дахка хьабелгал а даьха яздаь да «Къаьнара гIалгIай ашараш», «ГIалгIай берий ашараш» яха цун шиъ кхоллама балхаш. Уж арадайнад 2018 шу чакхдоаллаш.
Ший низ дIакхоачачох цу шинна а оагIорахьа йола ашараш гулъеш, царца дукха къахьийга, уж хIараяр ноташца дIаязъяь белгаляьхай Фаризас, моллагIа ашараш лекхачарна уж таптара тIара Iоешарца кхоачашъе аьттув хургболаш. «Къаьнара гIалгIай ашараш» яха таптар 24 ашарах латташ да, хIаьта «ГIалгIай берий ашараш» яхар 26 ашарах латташ да. Из гуш да хIарачун тIехьашка боалабаьча чулоацам тIа хьажача.


Дукха хана денз Фаризас къахьийга баь болх ба, цо хIанз цхьацца къаьста таптар а даь хьаарахийцар. ХIана аьлча, цхьан дийнахьа, кIира, бетта, шера булуц укх тайпара болх. МоллагIдолча хIаманна тIакхача, ше каралаьца никъ чакхбаккха къахьега деза сага, иштта къахьийгад ала йиш я Фаризас. ХIанзалца ца хинна аьттув ба тахан ашараш лекхарий, къаьнара гIалгIай ашараши, гIалгIай берий ашараши еша а, йовза а наха юкъе уж малха яха а.
Духхьал шийна цхьаннена гульяча ца а юташ шийна дукхадезача ший халкъа дIаязъяьй уж хIараяр Шадыжнаькъан Фаризас. Ший къама юсийла аьнна гулъяь я цун уж ерригаш а. ХIанз вайна юкъе кIезига ба къаьнара гIалгIай ашараш йовзараш а, уж лекхараш а. ХIаьта берашт-м хIанз дукха чам а хилац шоай ашараш лекха, е ловзарга даха.
Укх тайпара болх кхоачашбеш хилча ахчанцара гIо эшаш хул. Цу ашарашта кепа тоха шийна гIо-новкъостал даьча Наьсарен шахьара даьна ТIумхой Iалихана баркал йоах Фаризас. ХIаьта «Сердало» редакцен цIерагIа автора ловца боаккхаш аз ях. Беркате хилба цун кхоллама болх. ДIахо а кIаьд ца луш къахьега аьттув балба цун. Ираз долаш яхар хилда.

Матенаькъан Илез

№ 58 (12193), ера, 18 апрель, 2019 шу / четверг, 18 апреля 2019 года

Добавить комментарий

Ваш e-mail не будет опубликован. Обязательные поля помечены *