ГIалгIайчен Мохктохкара музей дунен тIа эггара лакхагIа я аьнна къоабала яьй

Меттаоттаяьча Магас шахьара 25 шу дизари, къаьнарча Магаса 1076 шу дизари дездеча гIалгIай тархьара Мохктохкара музей хьайийлар Магасерча 100 метр лакха йолча Барта ГIала чу. ХIаьта рекордашта регистраци еча «Интеррекорд» яхача халкъаштаюкъерча агенствос дунен тIа из музей эггара лакхагIа я аьнна дIаязъяьй.

Россе Магасе кердача рекорда регистраци оттаяьй: «Укх дунен тIа эггара лакхагIйола Мохктохкара музей Магасерча Барта ГIала тIараяр я. Регистрацен лакхала боарам 99,97 метраш я», – аьлар рекордашта регистраци еча «Интеррекорд» яхача халкъаштаюкъерча агенства кулгалхочо Копылов Влада. Из бакъдеш дола тешал цо хьаделар Мехкдаьга Евкурнаькъан Юнус-Бекагеи, Магас шахьара даьга ЦIечой Бесланагеи.
2013 шера Магасе Аланой майдан тIа хьалъяьча Барта ГIала чу я из музей. ГIаташца йийкъа я музей, хIараяр ше-ший декхар кхоачашдеш а йолаш:
«Хьалхарча гIата чу хIама довзийтара куц да, цига хьалдадаш сурташ да ГIалгIайчен оттара тархьар довзийташ. ШоллагIча гIата чу тайпай а боккхийча наьха а совета моттиг я, кхоалагIча йиълагIча гIата чу – юкъерча бIаьшерашка баьхача гIалгIай вахара хьал довзийташ, цу хана даьша леладаь гIулакхаш хьахьокхаш йола оагIонаш белгал яьхай. ХIаьта пхелагIча гIата тIа Къилбаседа Кавказе лакхагIчарех йола дIа-хьа хьажара майда я», — аьнна дийцар шахьара дас.
Евкурнаькъан Юнус-Бека яхачох, музей хьехама оагIонаш теркалъеш хила еза. Къаьнара куцаш гойташ хиларал совгIа, дешара-кхетама юкъарал а хила еза укхаза.
«Тешаш ва со, ер музей хьаелларо вай къаман тархьар а, этнографи а доаржадара даькъе дикка мул боаккхаргхиларах. ЧIоагIа лерхIаме да цIенхашта дешар, хьехам, хIама довзар, гIулакх, эхь, эздел къаьстта кагирхошта юкъе доаржадеш из хилар. Цудухьа вай дешара министерствога ях аз, шера массехк урок еш укхаза а кхычахьа а музеешка цар болх дIабахьар геттара тоам беш хургда», — аьлар Мехкдас Евкурнаькъан Юнус-Бека ший къамаьле.

Матенаькъан Илез

№ 61 (12196), шинара, 23 апрель, 2019 шу / вторник, 23 апреля 2019 года

Добавить комментарий

Ваш e-mail не будет опубликован. Обязательные поля помечены *