ГIалгIайчен культура дегIайоалае уйла йолаш

ГIалгIай Мехка ше воагIаш дена балха гIулакх чакхдоаллаш, РФ культура министра Мединский Владимиреи, ГIалгIайчен Мехкдас Евкурнаькъан Юнус-Бекеи вIашагIкхетар дIадихьар мехкарча культура даькъе къахьегама болхлошца цхьана.

ВIашагIкхетара доакъашхой дагабайлар театра шераца бувзабеннача мехка балха гIулакх доашхаш. Культура а, театра а даькъе къахьегачар шоашта хетар оалаш къамаьл дир, цул совгIа, гIалгIай Мехка культура, къаьстта театр дегIадоаладар хьаькъе дош дийцар цар.
Мединский Владимира белгалдир Москвеи, Санкт-Петербургеи хиннача ца а Iеш Россе кхыча шахьарашка а хила деза доккхий культура кхоачамаш, аьнна. ХIаьта из кхоачашдар духьа мехкашка хьаеллаш йоккхийча театрийи музейи филиалаш я.
Культура дикаш Iалашдар, культураца толамаш дахар, начIал долча къонбарашта шоай уйланга кхача аьттонаш далар духхьал йоккхийча шахьарашка хинна диса йиш яц. Из деррига а массадолча оагIорахьа паччахьалкхен массадолча мехкашка кхоачам болаш хила деза. Цудухьа оаха цхьан оагIорахьа культура дегIайоалаяргахьа вайна хьалхалаттачар оагIо хьаллоац, хIаьта вокха оагIорахьа, вай паччахьалкхе массанахьа а культура дегIаяр доаржадеш къахьег», — аьнна белгалдир Россе культура керттерча министра.
Цо яхачох, культура министерствос цифровой культура дегIаяргахьа боккха теркам бу. «Мел эшар интернетера хьаэца аьттув хургболаш хIама де деза: классически мукъама концерташ прямой эфирашка хьахьокхар, гаьнара концертни доккхий цIенош, кино, спектаклаш Iалашдар, иштта кхы а цу тайпара вIашагIкхетараш дукхадар», — аьнна тIатехар Мединский Владимира.
Из доацаш министра белгалдир, ГIалгIай Мехка юрташка культура цIенош хьалдарах йола программа хьинаре кхоачашъеш хилар. Цул совгIа, ГIалгIай Мехка зIамигача шахьарашка кинотеатраш хьаелларгйолаш гIо дергда ше аьлар цо. «Чам ба укхаза нах бисийта, царга болх байта, бераш маьрша хьалкхийта. ХIаьта оаха тхоай оагIорахьа гIо дергда, юкъара чоалхане хаттараш дашха чам болаш къахьегаш волча ГIалгIайчен Мехкдаьна», — аьлар министра ший къамаьл чакхдоаллаш.
ВIашагIкхетар дIадерзадеш, культура дегIайоалаяргахьа баркал алара гIулакх дIадихьар гулбенначар. Иштта искусства даькъе ГIалгIайчен балха моттигаш вIаштIехьайоахаш хьинаре къахьийгача Росси театральни искусства института (ГИТИС) ректора Заславский Григорена «Заслуженный деятель искусств Республики Ингушетия», яха лерхIаме цIи белгалйоаккхаш дола тешал делар.

Матенаькъан Илез

№ 63-64 (12198-199), шоатта, 27 апрель, 2019 шу / суббота, 27 апреля 2019 года

Добавить комментарий

Ваш e-mail не будет опубликован. Обязательные поля помечены *