Кери, къайги

Цкъа керои, къайгои шоайла хьоашал тесса хиннад, массаза цхьана дахаргда вай аьнна чIоагIо а яь. ТIаккха шоашта даа хIама лаха наькъа арадаьнна гIайтта долхаш хиннад уж шиъ. Долхаш, долхаш гаьнадаьннад оалхазараш. Сов чIоагIа кIаьдъеннача говзача, тийшаболх боаллача къайго цхьанахьа гаьн тIа Iолох а енна керага аьннад:
— КIаьд чIоагIа еннай хьона со кер, кхы дIагIатта магац сона. Iоа гаьнна цхьанахьа бенна уллаш уст гу сона, даха Iа цу тIера сона дулх ца дахье, кхы хьалгIатта ца могаш укхаза Iохайнача ягIа юсаргья-кх со, — геттара кIалйиса хьоастаеннай къайг, тийшача балхах дукха хIама ца ховча керага.
Ше ма додда дахад кер новкъост-къайго белгалбаьча истара тIера дулха чIегилг яккха. ХIаьта из уст улла моттиг цхьан аьлано оалхазараш лувца аьнна егIа боанг хиннай. Даха кер дулх даккха дIатIакховдаше боанго дIалаьцад. ХIаьта из шийна бIаргадайча цхьаккха хIама а ца оалаш ше яьгIачара хьал а гIетта, ткъамаш техха яьнна дIаяхай къайг. Миска кер аьлано дихьа аьшкасаьргех даьча кирка чу деллад.
ХIара дийнахьа кхыдола кер тIа а дай, даггара кирках ткъам бетташ, цу чу доаллача керага цхьацца хIама дувцаш Iийхе дIадодаш хиннад. Из гIулакх зийнача аьлано оалхазарий мотт ховш вола саг хьа а вийха цунга аьннад, хIара денна тIаухача керо лаьца чудоаллачунга дувцар фуд тахка шийна, аьнна. Вокхо керашка дикка ла а дийгIа аьннад:
— Лаьца чудоаллача керага йоах тIаухачо: нагахьа санна Iа доттагIал кераца тессадаларе иштта лаьца чудоалларгдацар хьо. ХIаьта Iа къайгаца хьоашал тассарах цунга хьежжа бала хиннаб хьона.
ТIаккха аьлас шорттига боанга чура хьаара а даьккха дIахийцад, тийшача балха говзал ца йовза кер.
Укх дувцарах хьаькъал эца деза вай. Мегаргдац ший лагIа тIа ваоцача сагаца хьоашал тасса. Цо цхьан дийнахьа дIалоацийтаргва хьо

Хьадийцар Цискнаькъан Iаде Мувса
ДIаяздаьр Матенаькъан Илез

№ 63-64 (12198-199), шоатта, 27 апрель, 2019 шу / суббота, 27 апреля 2019 года

Добавить комментарий

Ваш e-mail не будет опубликован. Обязательные поля помечены *