Сийленг – пхи са бола седкъа

Сийлахь-боккхача Даьймехка тIем тIа котало яьккха 74 шу дизарга хьалххе кийчо еш бар Сурхо тIара нах. Эггара хьалха белгалдаккха деза укхазарча школашка (уж ерригаш йиъ я) дезача цIайна хетадаь дагалоацама денош чакхдаьха хилар. Дешархоша цIаькха тешал дир мохк моастагIчох мукъабоаккхаш хинна нах шоашта бицбенна цахилара, цар денал дола гIулакхаш дагадоагIаш хилара.

Цул совгIа, юрта чувоаллача, Кен чу оалача моттиге, хьалха сийленг даьгIача хьалдаьд кердадар. Из пхи са болча цIеча седкъан кеп йолаш да. Цаховш нийсденнадац из укх юрта, хIана аьлча духхьала укх цхьан Сурхо тIара тIем тIа ваха хиннав 750 саг. Фашизманна майра духьаллаьттарех ва воккхагIвола лейтенант Албогачиев Элберда Сулейма, лейтенант, эскадрона командира заместитель хинна, ЦIеча Седкъа орденца белгалваьккха Арчаков Бексолта Берса, тIем тIа де доацаш вайна Измайлов Керама Махьмад, Измайлов Хьусен, Муцольгов Iаддал-Мажита Зяудин (вийнав 1942 шера), Муцольгов Уматгири, Муцольгов Охлой МаIас (вийнав 1943 шера), Медов Махьмада Шовхал (вийнав 1943 шера). Иштта цу тIем тIа дакъа лоацаш хиннаб Аушевар тайпан Ювсапа Хьажбикар, ГIаьбартечун Хьасан, Сосе Японца, Мусий ИбрахIим, Толвсолта Абукар, БаIадала Султан, Ахьмада Къарамсолта, Медаров Хасолта Махьмад, кхыбараш. Ала деза, тIеххьарвар хIанз а волаш ва аьнна.
Керда хьалдаьча сийленга тIа тIем тIа лаьттарий а байнарий а цIераш дIаязъяь улг техача дика хургдар, хIана аьлча, тIем тIа хиннаб яхараш юкъара дешаш да, белггала цIераш дIаязъяь хилча, кхувш йоагIача къонача тIехьенна ховргда малагIа денал дола гIулакх карагIдаьннад шоай юртахошта, царна масал эца а доккхал де а хIама хургда цох. Цул совгIа, царех цхьабараш цхьаннахьа хьоахабеш бац, цар гойта денал малагIа да, малагIа юрташ, гIалаш мукъаяьхай дувцаш дац.
Коталон денга цу тайпара сийленгаш хьадийллад МагIалбика района Долакоа, СоагIапча, ЖIайрахьа. Тамаш я вай мехкара зIамига а йоккха а – цхьаккха юрт хуле, бувцача тIем тIа яьккхача коталон ший дакъа юкъе ца хьош.

А. Салиханов

№ 73 (12208), шоатта, 18 май, 2019 шу / суббота, 18 мая 2019 года

Добавить комментарий

Ваш e-mail не будет опубликован. Обязательные поля помечены *