ГIалгIай даарах дола книжка

Ма дарра из ховргда «ГIалгIай даар» яха укх шера арадаьнна книжка хьа а ийца Iодийшача. ГIалгIашта меттал эрсий мотти, ингалсий мотти мел лелабечарна а гIалгIаех цар мехках, даарах бола хоам бахьаш книжка да из. Цу кхаь меттал лоаца-лоаца дувц гIалгIай даарах, мехках, оамалех, Iадатех, динах иштта кхы а. Книжка яздаь, цу тIа къахьийга из арадаьккхар Чиленаькъан Хьава я.

Россе Федерацен чудоагIаш долча мехкашта юкъе эггара зIамагIболча ГIалгIай Мехка дахаш дола къам, ший доккхача тархьарах курал еш, ширача заман чура Iадаташ лоархIаш леладеш, вахара эздела никъ лелабеш хьадоагIа. ГIалгIашта дика довз шоай гIулакх, кIоарга хьаькъал долча даьша лелабаь никъ, цар хьадена вахар да тахан цар леладер.
Хийла арахьара тIавенача сага ала тарлу гIалгIай даар хала да аьнна, бакъда цкъа цох чам баьккхача, цунга ваьле из дезаш хул саг. Дукхача хана денз оалаш да: «Воаш Iочудуачох хьахулаш да вай» аьле. Даар кийчдеш долча Iадатага хьажжа дIайха даараш мишта кийчду, малагIча хIамах мишта, фу тох, сенна тох – из шедар наха зIамига болча хана денз хьаIомаду. Кхыча къамай даарраш мел чам болаш дале а, ший дар хозагIа хет сага. Цудухьа къаман даараш кийчдеш дола Iадат хадданза хоттаденна да культуран оттамца.
Цу книжкан цIи «ГIалгIай даар» аьнна яле а цу тIа духхьал даар кийчдара къаьнара-хIанзара рецепташ яздаь Iац. Цох хийцца ала йиш я гIалгIай къаман са. Из цIи яьккхача нийсагIа а хургдар цох. Уйла йовза йиш я иллешкеи халхарашкеи, къаьнарча дувцарашкеи гIолла. ХIаьта малагIа Iаьдалаш да къаман, ха йиш я цун оамалаш хьахьокхаш долча гIулакхашкахьа. Уж гойтача моттигашка, цIай дездеча, вахара куцашца, даар кийчдеча, из Iооттадеча, хIама дуаш шун тIа вагIача. Нагахьа вай бувцар гIалгIай мохк бале, цун хIара даара кхоачам къаман цхьа Iадат хьахьокхаш ба. Сов доккха доацача йоазонца, дуача хIаман белгало хьа а хьокхаш, из мишта кийчде деза хоам беш я книжка тIарча хIара рецепта кеп.
Из Iодийшача сага йовзаргья маIача наьха а кхалнаьха а лерхIам хьахьокхаш йола шиш бола моттигаш. Укхазара ховргда боккхагIчар сий дар миштад, малагIа Iадаташ да лаьтташ, доахан, нокхарий леладерий; довзаргда гIалгIаша сий деш дола хьаьша тIаэцар; дIаяхача хана леладаьд яхаш дIадаьнна тарматал мишта леладеш хиннад; цIихезача гIалгIай гIишлонхоша вIовнаш мишта яьй, иштта кхыдараш а.
Вай фуннагIа дувце а керттера укх тIа ювцар-м даар кийчдара говзал ма йий. Цудухьа еннай книжкан цIи а «ГIалгIай даар» аьнна. Духхьал чулоацами сурташи хинна Iац укх тIа. Укхаза да, даараш мишта кийчду а цар чулоацам а бувцаш дола зIамига дувцараш. ГIалгIаша малагIча Iадатаца декъаш хиннад дулх? Мичахьара доаккхаш хиннад цар тух? Сенца хувцаш хиннад тIакхухьаш дола шекар? Везача хьаьшан даара тIа устагIан кортеи, накхеи, думии фу маIан долаш хьош хиннад? Уж а кхыдола хаттараш а доашхаргда ер книжка дийшача сага. Цун ховргда кхерза «пицкхаши» (зIоакаш), мерза хьовлеи кердача заман чура фабрике хьаяь дIахьоарчаяь хIамаш йоацилга, уж ширача заман чура мерза даараш долга, гIалгIай кхалнаха бIаьшераш хьалха уж кийчдеш хинналга а. Шоана гучайоаккхаргья гIалгIай цIихезача бугIаша яхьашка кийчлуш хьалха фу юаш хиннай.
ХIанзле цу книжка тIара цхьаццадолча даарий сурташ язде а, уж къоалама басарашца цхьана шоай кулга говзалца каьхата тIа доахаш а ба цхьабола суртанчаш. Цхьаболча наьха цIеношка пенех хьалдийтта доахкаргда уж сурташ, геттара цIен че хоза а еш.
Укх тайпара ГIалгIайче дунен дIайовзийташ ер книжка хьалхара яздаь да. Къаьстта гIалгIай кхалнаха боккха кха а, доккха товр а хинна дола ер книжка 500 экземпляр мара арадаьннадац. Бакъда, ший хозалга, доккхалга, чулоацамга хьежжа ахча дукха дIадахад цунга. Автора ший таронца баь болх ба ер. Укх книжках пайда мел эцача хана наха баркал яхаргда ер яздаьча Чиленаькъан Хьавайна.
Жи, дукха дахаш дешалаш «ГIалгIай даар», керда хьаькъал эцаргда оаша цу чура.

Матенаькъан Илез

№ 79 (12214), ера, 30 май, 2019 шу / четверг, 30 мая 2019 года

Добавить комментарий

Ваш e-mail не будет опубликован. Обязательные поля помечены *