Хиво бегаш биц

Сага вахаре эггара хозагIйола ха бера ха яр аргдар аз. ХIана аьлча, дешара салаIа чухийца, гIад а даха ловзаш, удаш, мерза сомаш буаш, хи тIа лувча ухаш царна дукха еза маьрша ха я из. Цул совгIа, мукъа хул уж.

Воккхачунна а зIамигачунна а дукха дезаш, цунца чам болаш хIама да, хи тIа лувча ахар. Ахка хьатIадеча долалу бераш додача хи тIа, е Iам тIа аха. Геттара хоза хеташ, хий кIоарга дале а, цу чу тувсалаш, дог гIоздаьле хьувзаш хул бераш. Уж бIаргадайча хеталу, массадола бераш цхьатара да-кх, аьле, цар оамал я из. Вай а хиннад цхьан хана ишта.
ДIайхача дийнахьа Iам чу е додача хи чу лийчача геттара дегI мукъадоал. Эсс, Шолжа, Iарамхи, Тирк, Фарт, Кен, Наьсар, Яндар, ГIалми иштта кхы а дукха хиш да. БоккхагIчарна дика довз уж хиш, уж лувча иха цар цхьана самукъане ха дIакхихьа моттигаш я уж.
Вай оалаш да, ший лоIамагIа а волаш хи чу дIачу а ваха венна саг кхераме ва, аьле. Цул совгIа, хий, мух, цIи уж кхо хIама чIоагIа унзара лоархIаш да. Лоравала везача унзарча хIамах да хий, цкъа цу чу лайжа чу ваха саг дийна а волаш хьалваккха хала ва. Цудухьа лоравелча бакъахьа ва зIамига а воаккха а.
ТIехьарча деношка хьахоз вайна вай мехкарча додача хи чу а, боккхача Iам чу лувча уха кагирхой, бераш дайнад яхаш. Уж Дала Iалаш болба. «Водар кога кIалха доал», оал вай. Хаьтта дагIац во а, ше хица мел хьакхашта вале а лоравалар зене дац сага.
Чам болча сага, нагахьа санна из лувча ховш веце Iомавала аьттув болаш ба вай мехка. Наьсаре а, Магасе а долаш да вай мехка кIаьнкашта а йиIигашта а лувча белгалдаь бассейнаш. Миччахьа доде а лувча дIадодача бераца воккхагIа саг дIавахийта веза уж лорадергдолаш, царна цаховр дIахьалха доаккхаргдолаш. ХIама хьанийсденначул тIехьагIа ишта-вешта даьдаларе хургдацар из вай аларах доалаш дац, цу хана тIехьа хул из гIулакх.
Вай ма гIо яхе а бераш даханза Iац хи тIа, цар са тIалатта моттиг я из. Цудухьа, уж цига дIадахача лора а луш лерттIа доаггIача тайпара нек а деш лувчаргдолаш, гIулакх гоал далале ханнахьа воай бераш нек де Iомаде деза вай. Цул совгIа, шийна йовзаш йоацача метте чу ца гIийртача а бакъахьа ва саг – зIамига а воккха а.

Матенаькъан Илез

№ 88-89 (12223-224), ера, 20 июнь, 2019 шу / четверг, 20 июня 2019 года

Добавить комментарий

Ваш e-mail не будет опубликован. Обязательные поля помечены *