Лоацца дувцараш

Осминаькъан Хьамзат

письмо

Бирса а сагота а ха яр из. Дезалхо е кхоаччара гаргара саг тIем тIа воацаш нагахьа цIа дацар. Цудухьа дукха хулар ший-шийга письмо дарга сатувсаш бола нах. Иштта нахага даьхка письмош дIадекъаш хIара денна юртах чакхвоалар къаьна Мовсар.

Сона шаьра дагадоагIа: цкъа тха лоалахочоа – хьехархочоа Маржана наIарга вера Мовсар. Кхайка ара а яьккха, дIакховдадир цун маьрагара фронтера дена кхаь саьна письмо. Сагота мишта хургьяцар Маржан цу каьхата! ИттлагIа бухт бар цун цIен-даьгара каьхат доаца.
ХIа аьнна шийга дIакхоаччашехьа, Мовсар дIавахарга а ца хьежадеш, даьстар Маржана каьхат. Деша эттар. Каьхат дIахо ме деш гIозъяьлар Маржан, цIаьхха духьалара морх дIа а яьнна, малх гучабаьлча санна, бос баьлар цун. Сов гIадъяхарах дог чIаьхка бIаргашка хий а кхехка, тIеххьара а, кхы къовла низ а боацаш, басилгаш тIа гIолла Iохьийдар цунна боккха-боккха ши хи тIадам.
Из деррига гуш лаьтта со Мовсарах а цун балхах а хьегар. Сона дега тIа дера: ма доккха ираз да-кх, тахан Маржана дог цо хьаьстача тайпара, наьха дог хьоасташ ваьха чакхвала йиш хилар! Ма ираз да-кх!

МАЛА ЯР БЕХКЕ?

Когаца кхестаеча машинаца ший цхьа барзкъа тегаш йоаллар укх шера йиълагIча классе деша аха йолаеннача Лидай нана – Хади. Нанна юххе дIатIа а яха аьлар йиIига:

– Аьшк тоха езаш да, мама, са лента, чIоагIа хьерчаденна да ер. Аьшк йIохъе мегаргйий аз? – ЙиIига бе доаллар керта кIажаргех тувсаш дола лента.
– Мегаьд, – аьлар нанас, – дIачуйолла.
Резетках дIачуелла йIох а ялийта, нийсдаь лента Iоа дилла аьшк тоха эттар йиIиг. Цунах ца яшаш корта а оагабаь, Лидайна дIатIаяхар нана.
– Хьовкха сога. Хьона-м аьшк тоха даьра ховргдацар.
– Мама, айса, айса. Сайга тохийта сога, – хьоастаелар йиIиг.
– ДIаяла хIанз! Аьшк тохаргйолчоа тара дац Iа детта кулгаш, – аьнна, йиIига бера аьшк хьа а яьккха, из юстара а кхесса, нанас ше техар лента аьшк.
Цул тIехьагIа цхьа ха яьлча:
– Са кIайча гата тIолг аьшк тоха езаш да, мама. Аз айса тохаргья из е Iа тохаргья?
– Хьона ховргдац цунна аьшк тоха. Сабарде. Айса тохаргья аз.
Цхьа шу даьнначул тIехьагIа:
– ХIанз а са школьни форманна аьшк тоха ца езаш санна ма ягIий хьо-м, мама! Маца тоха лаьрхIа я хьо из?
ЙиIига де ца доагIача тайпара хьакхашта деча цу къамаьла раьза йоацаш цкъа Лидайна бIара а хьежа, доккха са а даьккха, йиIига школьни форманна аьшк тоха эттар нана.
ИттлагIча классе дIачу а яьнна, кхергахьа дIалестаяр Лида цо наьнага ер къамаьл деча хана:
– Со школе яха еза ха гарга кхаччалца ягIа а яьгIе йолалу хьо са барзкъашта аьшк тоха. Кхы ца а ягIаш, хIанззе а йолале са морача зипа коча аьшк тоха. ЛерттIа шув боаккхаш дика а тохалахь из. Наьха дараш мо шаьреи шув болаши хилац Iа аьшк теха барзкъа. Нахах а эхь хет сона-м цхьа тасбахь а дийя Iа хьатела барзкъа дийха араяла…
ДIахо фу аргда-хьогI Лидас ший наьнага?
Хьан бехка Iомайир-теш Лидас из во оамал?

№ 94 (12229), шоатта, 29 июнь, 2019 шу /суббота 29 июня 2019 года

Добавить комментарий

Ваш e-mail не будет опубликован. Обязательные поля помечены *