Йодаяьча сагах тоам бар

Цхьан воккхача сага воIа аьрдагIча наьха саг йодаяь хиннай.
Лакхача гув тIа дагIаш хиннад воккхача сага цIа. Ер Iохьажача, дуккха машенаш бIаргаяйнай укханна ший цIа долчахьа хьалйоагIаш. Ший ма хула сиха Iадухьал вахав воккха саг царна.
Ер бIаргавайча, хьалхара машен соца а яь чура Iоваьннача сага хаьттад. Укхан цIи а яьккха:
— Хьанехк мичахьа ваха хой хьона, аьнна.
— Хов. ДIа вах шоана из, — аьннад воккхача сага, ший цIенна пIелг тIа а хьекха.
— Фуд цига, сенна веза шоана из? — аьнна хаьттад воккхача сага.
— Цун воIа саг йодаяьй тха! — аьннад машена чура Iоваьнначо.
ТIаккха фу саг ва из аьнна хаьттад цо воккхача сагага.
— Даьра Iа хетта саг во ма вац, зене, зуламе воацаш, шийна хьаьнала къахьегаш, юртаца а мехкаца а тарлуш вахаш саг ва из, дезал а харцахьа бац цун. Бакъда цун сесаг йий, из сийна шайтIа да, ма хулла сихагIа шоай саг хьаяккхалаш, а аьнна, ше ма вода маьждиге хьалвахав воккха саг.
Ер хьалкхаьчача, имам юкъе а волаш дукха нах хиннаб маьждиге багIаш. Воккхача сага аьннад царга тIа вийрза:
— Шо оарцагIа ца довле дов хила мегаш да шоана гIулакх. Са воIа саг йодаяьй аьнна, шоай саг дIаяккха аьнна, дов дахьаш хьабаьхка дукха нах ба са коа багIаш. Жи шоай ма хулла сухалбелаш.
ТIаккха имам юкъе а волаш, уж нах а йица сов сиха хьалчувахав воккха саг.
Ераш дIа коа баьлча, ков хьалдизза нах хиннаб воккхача сага коа.
— Ер фуд? – аьннад имама. – ЙоI маьре мел яхача вай вIашагIлете, къаман фу хадарг ма дий вай. Оаша леладер фуд, ткъаь итт машена чу а хайша хьадаьхка — тIатоIабаь бехк баьккхаб молла йоI цIайига баьхкачарна.
ДIадийца, хьадийца йоIах тоам байтаб наха. Юххера гIулакхах тоам а машар а хинначул тIехьагIа цIен-да мичав, аьнна хаьттад хьабаьхкачарех воккхагIчо. ТIаккха наха юкъера хьаараваьннав воккха саг:
— Со ва цIенда, — аьннад цо.
Воккха саг бIаргавайча хьа мел баьхкараш белабеннаб:
— Ай хьо вецарий тхьовра сесаг сийна шайтIа а да, шоай саг ма хулла сихагIа цIа а йигалаш яьхар, цу хана хьаала мегацарий Iа, са воI ва из аьнна?
— Со се эгIаваь вац, эгIазбаха боагIача наха духьал а ваха са воI ва из яха, — аьннад воккхача сага. — Даьра кертах богаш йоахкаш-м хургьяр сона иштта Iовдала валаре, — аьнна вела а венна бегаш тIа даьккхад воккхача сага къамаьл.
— ХIанз кертах хIама а кхийттаяц, корта а лазац, гаргалол а хьахилар, халахетар а дIадаьлар, сона дика захалаш а хилар, — аьнна, иштта дIадерздаьд дов хьаькъал долча воккача сага.

ХАМХОЙ Дауд

№ 96-97 (12231-232), ера, 4 июль, 2019 шу / четверг, 4 июля 2019 года

Добавить комментарий

Ваш e-mail не будет опубликован. Обязательные поля помечены *