Бежа гIокказа нахага дийца къамаьл

Iуйренна доахан лоахкаш хьавоагIаш бежа гIокказ вар. Шоай доахан Iулага хьалехкаш маIа нах а кхалнах а бар. Цхьан сага хаьттар Iунага:
— Миштаб хьа болх, дукха дий Iулаца доахан, мел ахча лу хьона хIара бежанах, раьза вий хьо хьай белха? – аьнна.
Iуно аьлар:
— ВаллахIи, геттара кIезига – лаьгIденнад Iул, наха хьалха мо леладиц доахан. Цунга хьежжа ахча а кIезига кхоач сога. Цхьабакъда, са болх аттача баьннаб. ВорхI сахьат даьлча мара Iуйренна арадаккхац аз сай Iул юртара, хIана аьлча, кхалнах – шун истий ворхI даллалца ког хийцца бийша ухкаш хул. Царга хьалгIатта оалаш цхьа мар а вац. Сона хац из фуд, царех ца бухьаш хургба-кх уж цар фусам-даьй ба яхараш, – аьнна дийцар гIокказа.
Цу Iунца къамаьл даьча къонахчо аьлар:
— Из хургдац иштта, мел кхалсаг чIоагIа лате а, ший марах. ХIаьта маIа саг котта ма варгвий кхалсагал, – аьнна. ТIаккха, — хьо вохьий хьай сесагах – аьлар къонахчо.
Вокхо жоп делар:
— Даьра, бакъдар аьлча, цкъаза со кIезига ахча дахьаш цIавеча, из са сесаг хьатIакъувсалу сона, наг-наггахьа хIама тохаш, – аьлар бежаIуно. – Аз башха хIама алац цунга – хIанз массанахьа цIен-ноаной кара дахад деррига доал. Де хIама дац, со а ва-кх лакхе аз бийцача шун нахаца юкъе, – аьлар велавеннача Iуно.

Дошлакъий–Юрт,
Саганаькъан Махьмада Руслан

№ 100 (12235), шинара, 9 июль, 2019 шу / вторник, 9 июля 2019 года

Добавить комментарий

Ваш e-mail не будет опубликован. Обязательные поля помечены *