«Сердал тела сурташ»

26 сентябре 2019  шера ГIалгIай Республика паччахьалкхен исбахьлен музей чу хьайийлай  Коазой Танзилай  персональни выставка. Тайп-тайпара жанраш лаьца бола 40 болх  ба цо выставке оттабаьр.

 

ХIара сурт наха дег чу дужаш, цар дега тоам хургболаш да. Цудухьа Танзилай творчески белхаш  довзараш а дезараш а дукха вIашагIкхийттабар музее. Цар дукха  ловцаш даьхар Танзилай говзача болхага хьожаш. ХIара  ший сурта тIа  хьагойт цо наьха вахара наькъаш, цунца цхьана ший вахара а, ГIалгIайчен хоза Iалам а.

Коазой Танзила 1980 шера Наьсаре яьй. Школе яг1аш  сурташцара безам  котбаьннаб Танзилай. Цо лаьрхIад суртанча говзамца ше вахар дувза. 1997 шера Нохчий педагогически институте «художественно-графический» яха факультете деша отт Танзила. Сурташ дехка говзал Iомаеш цун вар Нохчий Мехка цIи хеза художник Асухапов Абаса Амади. Хьалхара профессиональни навыкаш цунгара хьаэц  Танзилас. Цул совгIа вай ц1и художникас Поалонкой Махье Мурата Iомаю из сурташ дехкара говзалга.

Ший говзал дика караерзаяь яьлча Танзилас 2001 шера Грознерча художественни школе болх  бу, ший белха говзал кIоаргьеш къахьег цо цига.

2003 шера ГIалгIайче цIа а ена Наьсарерча художественни школе хьехархо балха йода Танзила.

2009 шера денз ГIалгIай  Мехка  суртанчий Союза юкъе я из.

Коазой Танзилай сурташка кIоарга хьажача дег чу керда уйла чуйосс. Вахарца безам совбоалл. Цун «ТIехьа йола гуйре» — яхача суртага хьажача мел кIоарга маIан долаш да из го вайна. Укх тIа гуш да гаьнна  лоам тIа улла лоа, IажагIденна гаьний гIанаш, Iодода хий. Массайола гуйре лоаттама башхало чулоацаш да из сурт.

Танзила дукхача выставкашка дакъа лоацаш хиннай вай республике а цул  арахьа а. Цун хIара выставка цхьацца цIай дездеш хетаяь я.

2007 шера «Са хьамсара мохк» яха выставка хетаяьяр ГIалгIай Мохк хьакхелла  15 шу дизара сийна.

2010 шера Международни Кружоновски дешарча 26 шу кхачара хетая выставка яр ДIайрахье. «Къаман традици лорае» яха выставка д1айхар 2010 шера  ГIалгIай Республика паччахьалкхен исбахьлен музей чу.

2011 шера «ГIалгIай кхалнаьха творчесто» яха выставка дIайихьай ГIалгIай Республика паччахьалкхен исбахьлен музей чу.

Хьанз хьайийла Танзилай выставка «Сердал тела сурташ» дIахьош я ГIалгIай Республика паччахьалкхен исбахьлен музей чу Карабулаке. Выставка хьаелаш дукха хьаьший бар Танзилай балхашка хьажа баьхка. Дукха хоза дешаш аьлар Танзилай балхагIа.

Вай мехка бахархой цунга хьажа  йиш хургья 2019  шера  21 октябрь кхаччалца.

Танзила хьа хьара ди хьона ираз дахьаш доагIалда! Даим наьха дог гIоздоаха сурташ дехка аьттув хилба хьа!

 

Л.Бекова

Добавить комментарий

Ваш e-mail не будет опубликован. Обязательные поля помечены *