Дика хувцамаш

Дукха дика хувцамаш хиннад Сунжах гIала ячул техьагIа. ГIала сибат хоздара а, наьха вахар тоадара а дог лазаш бола кулгалхой хилар белгало я из.

 

Эггара лоархIамегIа хет сона наькъаш тоадар, машенаца лела хала долаш кIоагаш даьхка наькъаш хIанз асфальтаца шаьрдаьд.

Белгалдаха йиш йолаш кхы а дукха хувцамаш да вайна хоалуш. Царех цаI я Сунже хьалъяь – дезала салоIама парк. Дукха дай-ноаной ба из сихагIа хьаелларга сатувсаш.

— Парк тахан хьаеллаш я аьнна хеза даьхкадар тхо, — дувц Алхастера ший ши бер доаладеш енача Мадинас. – ЧIоагIа сатувс бераш укх тайпара моттиге бахкара.

Берашта а, цар даьшта-ноаношта а салаIа дукха гIишлош яй укхаза. Берий городок хьаяь яннай. Цига йиъ кизга павильон я — цаI тенисни зал, шоллаг1ер берашта лаьрххIа Iохейна вагIаш ловзараш де моттиг я. Къаьстта хьаяьй спортивни зона, ший сцена а йолаш, кийчъяьй рекламни зона а. Хоза гувнаштара бена кхера а билла нийсъяьй  цхьа эзар ах эзар кв.метр йола аре. Маьлха батарейкаш сердал тела освещени яй беррига го чуберзабеш. Берашта лаьрххIа дукха ловза моттиг кийчъяьй – каруселеш, качелеш, кх д. Уж еррига гIишлош чулоацаш карт яй. Арахьа транспорта лаьрххIа площадка кийчъяьй. Е беррига болх цхьан саго алпи телаш беш ба, аьлар болхлоша. ХIанзчул тIехьагIа хьалъе езаш кафе-ресторан я тха, дувц болхлоша. Йисте гIолла хоза гIашлой лела тротуар биллаб.

Из парк хьае дагадехачунна, проект оттаяьчарна а, ахчанца болхлой Iалашбечунна Даьла раьза хилва.

 

Л.Бекова

Добавить комментарий

Ваш e-mail не будет опубликован. Обязательные поля помечены *