Шийна дарба де ше вахача амбулаторера волавала веза

Укх деношка сай гIулакха ваха  «канала дехьара» оалача Наьсарен района йоккхача поликлинике хилар со. Цига регистратуре багIача кхалнахаца къовсам баьккха кхесташ цхьа зIамига саг вар, ше тIа хIана эцац яхаш. Юххера а, дIатахка гIулакхага хьажача, зIамига сага ше районни поликлинике воагIаш ше вахача юртара направлени енаяцар. Цудухьа регистратуре багIачар цунна бIаргий лора тIаваха номерок хьаяла тигацар, цкъа хье вахача юрта дIа а вахе, цигарча хьай терапевтагара направлени а яхьаш хьавола, яхаш. Цига юхаваха кхестаргвацар со, тIехьагIа воагIача хана ховргда сона мишта ва веза унахочо яхаш а, са бокъо яц вокхо яхаш а гайр къовсам. Мичча тайпара дале а бIаргашка хьежача лоро – офтальмолого тIа а ийца гIулакх дир зIамигача сага.

 

Хаттар отт, фу бахьан долаш да из ишта, юрта бIаргий лор воацаш хилча, терапевта ховргдий-хьогI цу оагIорахьа дарба де, аьнна. Вахача метте массагIа хIама нийслу, саг цамогаш хулаш а, Iокхийтта хьалкхийтта лозавеш а. Цхьавар шийна могаш ца хилча цу сахьате лорашка вода, кхывар «дукха хIама даьдацар сона-м» аьле, ший лазара дукха кIатта ца беш Iа. Мичча тайпара дале а шийна ца моге лорашка вахар дехке варгвац. Укхаза-м мел могаш вар а вода лорашка ший могашал гIахьа хилийта.

Мехка бахархошта юкъе хоаттам беш чакхваьлча, лорашка ухаш болча нахах дукхаш ба юрташка прописка йолаш хилар бахьан долаш Мехка керттерча больнице хала тIаэца шоаш яхаш, кадаш. Из гIулакх мадарра хар духьа Наьсарен йоккхача поликлиника керттера лор йолча Горчхананаькъан Тамарайца цу хьаькъе къамаьл хилар тха. Цо яхачох, моллагIа юрта прописка йолаш вахаш вола саг, ший юрта амбулаторе участкови терапевта волча ваха веза, ше могаш воацаш хилча.

— Мала ва мах боацаш шийна Iаьдала таронах дарба дайта бокъо йолаш?

— ГIалгIай Мехка могаш боацачарна мах боацаш дарба дара программа тIаийцай укх 20I9 шера февраль бетта ГIалгIайчен Правительствос. Цу чу доагIаш да малагIча тайпара дарба де йиш йолаш ва а саг, маца, малагIча хана чухьа, мичахьа из да а. Хоаддаме белгалдаь да, могаш воаца саг ше вахача метте участкови терапевт волча дIатIа а ваха, цамогаш хинначул тIехьагIа деннеи-бусии 24 сахьата шийна лорага дарба дайта бокъо йолаш ва, аьнна. Цу дийнахьа из дIатIа а ийца цунга хьажа декхар ва хIара участкови терапевт. Геттара цхьа хала тIехьататта йиш йоацаш лазар мел доацачох цунга хьажа везаш ва терапевт. Нагахьа могаш воацачо скори помощь хьа а йийха цар белгалдаьча хьалага хьажжа ваха везе ше вахача юрта а ваха везе кхыдIахочахьа а лорашта тIагIоргва из.

— Нийслу, бIарг, лерг е юкъ лазадаьлча воддаше саг районни больнице водаш. Регистратурера юхахьожаву из хье вахача юртара направлени хьая аьле, из хIанад ишта?

— Нагахьа санна хьо Сурхо тIа прописка йолаш вале, хье вахача юрта амбулаторерча участкови терапевта тIаваха веза хьа цкъа хьалха. Цо хьа лазарга хьежжа ший аьттув бале, ший говзалца ше цу унахочоа дарба де йиш яле дарба дергда, деце направлени хьа а енна, кхычахьа хьога дикагIа лораш хьожаргболча дIавохийтаргва. Цул совгIа, амбулаторе еррига анализаш дIа а ийца кийчъергья, кхычахьа лорашта тIавахача дIаудаш, ше фу леладу а ца, унахочун кхеставезаргвоацаш. ТIаккха диспансеризаци, прививкаш, справка яккхар, арахьа больнице воде, е дарба де Iовижа везаш вале, из деррига унахочун прописка йолча юрта кхоачашде дезаш да. Из хIанад, унахочун а из д1ахьожаваьча лорий а ха йоа цае деш да из. Цу терапевта ха дезаш да ший юртарча ше Iунал деча унахочун хьал миштад. ДукхагIа мел дола лазараш участкови терапевта довзаш а цо дарба де йиш йолаш а хул. Из деррига хIана деш да аьлча, лоам ваха нейц мо ваха дIа а этта кегавенна унахочун лелавезаргвоацаш деш да из. Цудухьа ший фуннагIа лазайоале а ший юртарча участкови терапевта дIатIа а ваха цунца дагавоалаш из хьожийташ хила веза саг.

— Нагахьа бIарг лазаш со венавале терапевта сенах хов цу чу фу доал?

— Терапевт сага дегIаца мел йолча маьженна хьал ха дезаш ва. Юккъера хьаийцача цун дарба де ховргда, цхьагеттара гаьнадаьнна лазар из деце, цул совгIа ший унахо малагIча лора тIавахийта веза, фу бахьан долаш цун лазаш йола маьже лазаяьннай хов цун. Хьа лора хов хьона мел дола лазар, цун из довз, ха декхар а ба уж. ХIаьта кхычахьа, масала юкъ лаз са аьнна, хьо ваха дIаэттача, цу лоро хьона юкъа доагIа дарба мара дергдац, цига фуннагIа дале а. ХIаьта хьа участкови терапевта ха дезаш да из юкъ фу бахьан долаш лазъяьннай, юкъал совгIа кхы малагIа маьже хила йиш я цу лазара бехке. ХIана аьлча цхьадола лазар хул кхыйола маьже бахьанце лазаш.

— Хийла саг хул ший анализаш ханахьа хьалуц, бIарчча кIира хьежаваьв ше яхаш. Из миштад?

— МоллагIа сага дIалуш йола анализаш 1 денгара шин кIирага кхачалца хьаэца декхарба лораш. Шин кIирал хьалха саг миччахьа латкъе а цун ваха моттиг яц, хIана аьлча программа чу къоаггадаь яздаь да из. Нагахьа санна, шин кIира анализаш хьа ца луш унахо вуте, тIаккха цун гIулакх кхоачаш цадаьраш бехктокхаме озаргба, унахочун гIулакх хьал а дузаргда. Бакъда МРТ яккхара ха бIарчча беттага кхоач, нах дукха хилар бахьан долаш. Нагахьа санна геттара хала волаш, из МРТ яккханза яргйоацаш унахо хилча из телефон дIатехе а, керда заявка юкъе яьккхе а из саг чакхваккха хьож тхо. Вайна дезе а ца дезе а паччахьалкхен программа чу ишта яздаь да из. Цудухьа ший доагIар саго хьадеш хилча цунна а лорашта а аттагIа хургдар.

— ХIанз аз кхетадечох, ший цхьа хIама лазаяьлча юрта амбулаторе ваха везаш ва-кх саг, ший дарба дара гIулакх царга гIолла хургда.

— ХIаа. Миччахьа воагIе а ший участкови терапевтагара направлени а йолаш кийча анализаш а йолаш саг хьавеча тхона дуккха аттагIа да. ХIана аьлча, цун анализаш йоацаш хилча, из узи ухийташ, флюра тIа гIо яхаш тха терапевт хьувзаше ха дIайоал. Лора ха а йов, къаьстта цу унахочун ха а йов. Тхо-м цунга направлени еце а цун гIулакх дир духьа хьож цунга, эшар кхоачаш а дий оаха дIавохийт из, бакъда из унахо цхьане хила везаш ва, цхьанахьа учете латта везаш ва из. Ший участкови терапевт хила веза цу сага мел дола лазар довзаш, цун фу даьд ховш. Цудухьа оаха геттара дехар ду мехка бахархошка, шоаш тхо долча хьадахкале шоай юрта участкови терапевт волча дIа а дахе, цо фу йоах а хьаже цо шоашта хьаеннача направленега хьажжа дувла районни поликлинике хьа, аьнна. Ший ха лораяра а цу сага дикагIа ма дий из ишта хилча.

Матенаькъан Илез

Добавить комментарий

Ваш e-mail не будет опубликован. Обязательные поля помечены *