Г1АЛГ1АЙ МЕХКА КЪАМАН ЮКЪАРА ГАЗЕТ

Паччахьалкхен университета студенташта юкъе д1айихьа дешара-конференци

Гойгов Сипсой 1аддал-Хьамида кхоллам бувцаш дешара- конференци д1айихьар г1алг1ай паччахьалкхен университета филологически факультета студенташеи цар хьехархошеи. Г1алг1ай къаман дукхаг1болча йоазонхоша санна хьалхарча заман г1алг1ай къаман вахар да йоазонхочо ший белхашкахь дувцар.

Ховш ма хиллар массаболча йоазонхоша санна, цу заманчухь ший къаман дукхаг1 1аткъаш дола хаттараш белгалдаха а, дешархочо д1ат1аэцаргдолча тайпа уж 1ояьзде а говзал хиннай цун. Масала, «Джан-Гири» ц1и йола цун повесть яр студенташ укх наькъ йийцар. Цу т1а йоазонхочо хьагойта даь-наьна хьакъ лорадеш волча къонача з1амигача сага куц-сибат, цун оамал, цун хьал. Ма дарра аьлча 1аьдало то1адаьча г1алг1ай къаман вахар да авторо хьокхар.

Гойгов Сипсой 1адал — Хьамид ваьв 1896 шера. Цун хьалхара йоазонаш заметкаш, статьяш 1917 шерагара кепаетта йолаенний. Г1алг1ай йоазув кхы а халкъа юкъедена ца хилар бахьан долаш, эрсий меттал яьзде волавенна хиннав йоазонхо. 1925 шера яьздаьд цо «Джан-Гири» ц1и йола повесть. Цун чулоацам бувцаш, керттера турпалхой аматаш кердадоахаш, г1алг1ай къонахчоа дахка декхарийла дола г1улакхаш белгал а доахаш, цу повесте г1олла автор фу ала ваьлав а, нийса никъ бий-те повесть керттерча турпалхочо д1абихьар,− уж хаттараш дар студенташеи хьехархошеи д1айихьача конференци теркамга даьхараш. Ховш ма хиллар, цу ханарча деша говзанчий бокъо хиннаяц ди а къам а къестадеш йоазонаш де. Советий 1аьдал долча заманчухь арадаьнна романаш, повесташ, дувцараш интернационализм яхача деша т1адерзадаь хиннад. Х1аьта г1алг1ай къам массаза 1адат кертелоаттадеш хиларга хьежжа вай йоазонхошта атта хиннадац вай оамалга а г1улакхашка а товш доаца йоазонаш де. Иштта чоалхане лаьттача заманчухь, ший йоазон болх къаман хьал гучадоаккхаш д1абихьаб Гойгов Сипсой 1адал-Хьамид. Студентий в1аший хиннача къамалах ховш дар, автор ала ваьлар вай къонача т1ехьено дика кхетадолга.

Фатима Гагиева

15.12.2017 15:41
146

Комментарии

Нет комментариев. Ваш будет первым!
Загрузка...