Дунен тӏа а ӏаьхарте а пайда баргбола дешаш

Халида ибн Валида дийцад яхаш дувц ер хӏама.
Цхьа ӏарби венав, йоах, Даьла элча (Даьлагара салам хилда цунна) волча. Цо аьлар йоах:
– Ва, Даьла элчи, хьога цхьа хаттар де венав со. Сенах пайда баргба сона укх дунен тӏа а ӏаьхарте а?
Пайхӏамара (Даьлагара салам хилда цунна) аьлар йоах:
– Хьаалал, хьайна фу дез.
ӏарбечо аьлар йоах:
– Са безам ба нахал дукхагӏа ховш хила.
Пайхӏамара (Даьлагара салам хилда цунна) аьлар йоах:
– Даьлах кхераш хила, тӏаккха хьох хургва массарел дукхагӏа ховш вола саг.
ӏарбечо аьлар йоах:
– Са безам ба массарел вӏаьхийгӏа хила.
Пайхӏамара (Даьлагара салам хилда цунна) аьлар йоах:
– Кӏезигачох кхоачам беш хила, хургва хьо массарел вӏаьхийгӏа.
ӏарбечо аьлар йоах:
– Са безам ба нийсхо лелаеш хила.
Пайхӏамара (Даьлагара салам хилда цунна) аьлар йоах:
– Хьайна дезар наха а дезалга ховш хила, хургва хьо нийсхо лелаеш вола саг.
ӏарбечо аьннад:
– Са безам ба нахал дикагӏа хила.
Пайхӏамара (Даьлагара салам хилда цунна) аьннад:
– Наха хьайгара пайда боалаш хила, нахал дикагӏа хургва хьо.
ӏарбечо аьлар йоах:
– Са безам ба дикаш деш болча нахах хила.
Пайхӏамара (Даьлагара салам хилда цунна) аьлар йоах:
– Аллахӏа ӏамал е, Из хьайна гуш санна, хьайна Из ца гоййа а, хургва хьо дикаш ду саг.
ӏарбечо аьлар йоах:
– Са безам ба сай иман лакхде.
Пайхӏамара (Даьлагара салам хилда цунна) аьлар йоах:
– Хьай оамал тоае, лакхлургда тӏаккха хьа иман.
ӏарбечо аьннад:
– Са безам ба Аллахӏа мутӏахьа вола цун лай хила”.
Пайхӏамара (Даьлагара салам хилда цунна) аьннад:
– Хьайна Аллахӏа тӏадехка фаразаш кхочашде, тӏаккха хургва хьох Аллахӏа мутӏахьа вола лай.
– ӏарбечо аьлар:
– Сона дезар къемата дийнахьа лир доагаш а волаш се гӏоттавар.
Пайхӏамара (Даьлагара салам хилда цунна) аьлар:
– Цхьаннеца а харцо ма ювца, хургва хьо къемата дийнахьа лир доагаш.
ӏарбечо аьлар:
– Из Даьла къемата дийнахьа сайца къахетаме хилар дезар сона.
Пайхӏамара (Даьлагара салам хилда цунна) аьлар:
– Хьайха а Даьла лаьх а къахеташ хьо хуле, Даьла а хургва къемата дийнахьа хьох къахеташ.
ӏарбечо аьлар:
– Са безам ба сай къинош кӏезигде.
Пайхӏамара (Даьлагара салам хилда цунна) аьлар:
– Даьлагара дуӏаца деха хьай къинош кӏезигде, яхаш, кӏезиглургда хьа къинош.
ӏарбечо аьлар:
– Аллахӏа безача нахах хила безам ба са.
Пайхӏамара (Даьлагара салам хилда цунна) аьлар:
– Аллахӏа дезар, цун элчанна дезар дезаш хьо хуле, Аллахӏа безача нахах хургва хьо.
ӏарбечо аьлар йоах:
– Сона дезар Аллахӏа сай дуӏашта жоп далар.
Пайхӏамара (Даьлагара салам хилда цунна) аьлар йоах:
– Хьарама кхачах лоралуш хила, тӏаккха Аллахӏо жоп лургда хьа дуӏашта.
ӏарбечо аьлар:
– Малагӏа гӏулакх да Аллахӏа дезар?
Пайхӏамара (Даьлагара салам хилда цунна) аьлар:
– Дика оамал, мутӏахьа хилар, бала тӏабеча сатохаш хилар.

БӏАРХОЙ Муслим