Исбахьлен говзал гойташ

Магасерча Культура алсамъяккхарах йолча юкъарчен цIагIа вIашагIкхетар дIадихьар Назранерчеи, Шолжерчеи, Илдарха-ГIалий тIарчеи исбахьлен дешарчей суртан балхаш гойташ. Цох бола хоам бу ГIалгIайчен культура министерства пресс-службас.

Дешархой балхий гойтаме овттадаьдар тайп-тайпарча жанрах дола говзаме суртан балхаш. Иштта ГIалгIайчен юкъарча мукъама имшкола дешархоша а дунен цIихеза тайп-тайпара мукъам локхаш шоай говзал гучаяьккхар укхаза. Цар лийкха мукъама чоалхаш яр саксофон, скрипка, рояль.
Выставкага хьожаш дакъа лоацаш хиннача наха лакха мах бир кагирхоша даьча балхашта. ХIанз санна шоай говзал лакхъеш уж дIаболхе, цар лакха толамаш доахаргда, аьнна хеташ ва Гӏалгӏай Ресрпублика культура министр Дзейтнаькъан Темерлан. «ЧIоагIа гIадвугаш да ГIалгIай Мехкарча кагийча мукъамхоша а суртанчаша а иштта говза шоай болх караберзабар. КхувшбоагIачарна культура даькъе эшашдола хIама Iалашдеш гIо дар геттара лерхIаме хет сона, хIана аьлча, шоай толамашца ГIалгIайчен сий доаккхаргда цар», – аьнна белгалдир Дзейтнаькъан Темерлана.
Выставке доакъашхой геттара хоза хеташ хьежар къонача суртанчаша даьча исбахьлен балхашка. ХIаьта дунен тIа цIихезача мукъамга ладийгIача хийлачоа хетар, из локхар бераш а доацаш тIехдика говзанчаш ба, аьнна.

Матенаькъан Илез