Кердача шерца боаккха ловца

Керда шу – из керда лагIа да. Баьдеча, саготача фусаме ма дугалда вай цо. Сердалоно къоагабаь хилба цу тIа вай Iо мел ловза ког. Керда шу цкъа мара дагIац бIарччача шера. Цо цкъа яхьаш йола дегагIоз шу чакхдаллалца тоийла вайна. Iолегача Iажийдараш мара, тIемай таташ ма хилда дунен чу. Юаш йолча мистача гранатийдар мара, «цIий» Iо ма ухалда. ГIадваха велавенна даьннар мара, бIаргех хий ма далда. Бер дезачоа, бер хилда; кер дезачоа, кер хилда. Къона воллаше, къа ма лулва цхьаккха саг. ЦIена доллаше, тиш ма лулда цхьаккха барзкъа. Хьаькъал долаш вола саг наха гоама ма хилва. Ахчах хьалвикъа вола саг яькха ма хилва. Наькъа йисте сагIадехарг ма вагIалва: «Хьай Даьла духьа, хьай даьна, хьай нанна тIера цхьа сом да сона», – яхаш. Цо иштта дийхача, цунна дIадала цхьа сом хилда вай киса массаза.
Яьш ара ма латталда, шийлача Iан юккъе лоа чууллаш. Дулх хилда цар чу кхехкаш, чорпа хийла тIехмехкаш. Цу яьна юхе кхесташ бераш хилда. Берашта леладеций вай мел леладер а.
ЙиIигаш эздел долаш хийла: цIийлуш а кIайлуш а. ТIаккха мара йовзаргьяц йиIигий дикал. Сенна деза эздел? Дунен хозне цунца я. Эхь цунца да. Эздел долча наха юкъера хоза гIулакх цунца да. Эздел долча сагага моллагIа барзкъа товш хул. Цудухьа яьхад вай даьша: «Эздийчунга гали а тов».
Теникий тика чу кхаьчача санна, дега тоам беш хилда вай хIара ди, хIара кIира, хIара бутт, бIарчча шу. Вай вахаре хийла зурмаш, фаташ, пандараш. ЦIаккха моцалла, гIелалла тIа ма далда вай пхандараш. КIаьдвеннача сагá Iоха гIанд хилда. Хьогвеннача сагá мала хий хилда. ВIохвеннача сагá гаьний Iи хилда. Дикачоа, ше дика хиларах, баркал хилда; вочоа, ше во хиларах, кхоардам хилба. Вайна юкъе во нах бац аьнна хет сона. Нагахьа санна цу тайпара нах нийслой а, царна Дала моаршал а лолда!
Арчаков Сали