Спортивни яхьаш

Денгара ди массаза доал дег1айоаг1аш латт вай мехка спорт. Цунна еш йола терко кхолханеца вайга юхакхоач. Из гуш да  арахьарча спортивни яхьашка латташ болча вай кегийча наха доахача толамех. Хоза хет хьалхара моттиг яьккхар, аьлча. Уж йоахараш, вай бувца айттача, шортта а ба. Цудухьа ма хулла дукхаг1а эшачунца новкъостал лоаттадеш спорта вай кулгалхой хилар хоалуш а да. Цунна доаладе дукха масалаш да. Вай республике тахан «Кёкусинкай» яхача японций т1ема говзал йовзийташ йолча  каратэ тренер ва Дзангиев Алисхан. Из ва Г1алг1ай Республике г1олла йолча «кёкусинкай» каратэ федераце президент.

Алисхана яхачох, дукха терко т1аяхийта къахьегаш ба уж цу тайпарча спорта яхьашта. Иштта укх деношка Наьсарерча №13 йолча школе д1айихьар арг1анара яхьаш. Тренера белгалдир х1анз диазлаг1а уж д1ахьош хилар а.  Цига чулаца дезаш малаг1а доакъош да а. Республика каратэ говзал караерзаяра мел йолча школашкара дешархой бар цига дакъалоацаш.

Х1ара ах шу массаза дала цкъа д1ахьо яхьаш. Уж белгалъю пхе даькъах. Цу тайпара, х1ара арг1ах цхьацца беса дола т1ехкар даккхарца белгалйоал латара говзал. Масала, хьалхаг1а к1ай, можа, можа-сийна. Укх наькъа хиннар сийна-1ажаг1а долча т1ехкара лаьрх1а латар дар. Пхе тоаба йийкъа я эггара т1ехдола т1ехкар даккхара йола яхьаш. Уж хургъя т1ехьаг1а.

Шоай мел йола говзал, низ т1абахийта кийчденнадар бераш укхаза моттиг яккхара. Цар толамаш гуш хургда т1ехьаг1а д1ахьоргйолча яхьашка, цига белгалваргва котваьннар а.

БАТАЙНАЬКЪАНа Хь.